Vawiin khan Mizoram Skill Development Society (MSDS) chuan Bhullar Education Services Pvt. Ltd. (BESPL) nen I&PR Conference Hall-ah Memorandum of Understanding (MoU) an ziak. Thawkho tura intiamna thuthlung hi MSDS Chairman Pu Haukhuma Hauzel leh BESPL CEO Pu Michael Bhullar ten an sign a. Pu K. Lalnghinglova, Commissioner, Higher & Technical Education leh Pu P.C. Lallawmsanga, Principal Secretary, Labour, Employment & Industrial Training ten an telpui a, Thuthar lakhawmtute kawmna hun hman a ni.

Pu Haukhuma Hauzel chuan training pe thei mai bakah training zawha hnathawhna tur siamsak thei an ngaihpawimawh thu te leh, thawh tan tirh hlawh pawh tlem lutuk lo pe thei an society-in an zawn thu sawiin, chutiang taka an thawhpui theih tur an hmu chu lawmawm a tih thu te a sawi a.

Pu Michael Bhullar chuan Australia leh ram dangah chuan hna petu ten degree sang ringawt nilovin, thiamna chhawrtlak an ngaihpawimawh thu a sawi a; trainee-ten an zir zawha an thiamna chherchhuah leh certificate hmuhte chu Australia leh ram hrang hranga hmantlak a nih tur thu a sawi bawk.

Vawiin an thuthlung ziah hnuaiah hian Class XII pass chin tan Traineeship Programme buatsaih a ni ang a. Kum khat chhung India ramchhungah an training phawt ang a. Tha taka training zote hnenah Australian Certificate pek niin, Bhullar Education Services chuan Training & Research Visa buatsaih sakin Australia rama kum hnih (2) chhung “apprentice” anga thiamna tha zawk nei turin a zirtir leh ang a. Kum hnih a ral hnu hian kum li (4) dang hnathawh phalna neiin, kum khata cheng nuai 30 hu vel hlawh thei tura chhut a ni.

BESPL hnuaiah hian fabrication leh welding engineering-te, mechanical trade, manufacturing technology (CAD), mobile plant technology, heavy commercial vehicle mechanical technology, airconditioning & refrigeration leh electrical fitting zirna course te a awm a. He company atanga zirchhuakte tan hian Diploma-to-Degree (D2D) University pathways buatsaih sak niin, Australia University pali (Australian Catholic University, Charles Sturt University, Southern Cross University leh University of Western Sydney) atang ten Bachelor Degree program-ah an lut nghal thei dawn a ni.

BESPL kaltlang hian India ramchhhung bakah Middle East, Canada leh Australia-ah vek hna hmu an awm tawh a. He company programme-te hi Australia Sorkar hnuaia Technical & Further Education Commission leh India Sorkar hnuaia Nation Skill Developmrnt Corporation ten an hriatpui ve ve a ni a. Mizoram hi India state zinghah chuan hetianga MoU a ziahpui hmasa ber a ni.