Mizoram Legislative Assembly Secretariat chuan a hnuaia thawktu hrang hrangte pualin kar kalta chhung khan intuaitharna hun an hmang a. IV Grade atanga Under Secretary thleng tana training neih chu vawiin khan Assembly Speaker Pu R. Romawian a khar a ni.

Training kharna pual inkhawm Mizoram Legislative Assembly Secretariat Annexe Building Conference Hall-a buatsaih chu Assembly Secretary Pu Ngurthanzuala’n a kaihruai a. Training khartu Speaker chuan hriatna leh thiamna a pung a, Thil thar leh tih dan thar a piang zel a, chumi mila kal zel tur chuan intuaihriama, intuaithar ve zel a tul a ni, a ti. Assembly Secretariat a thawktute pawimawhzia sawiin dan siamtu, MLA te kut ke ber an nih avangin dan hriatna kawngah pawh hma an sawn ve zel a tul a ni, Speaker chuan a ti bawk. Tawng chungchang sawilangin Pu R. Romawia chuan tawng hi nunna nei, a than len zel loh chuan thih lam a pan a ni, a ti a thumal thar lak belh zel hian tawng a ti hausa a ni, a ti bawk.

MLA Secretariat a thawk LDC atanga Under Secretary training te hi mi 98 niin, Driver leh IV Grade training hi mi 56 an ni a. MLA Secretariat a Additional Secretary Pu Vanlalnghenga, Deputy Secretary Pu SR Zokhuma, Deputy Secretary Pu H. Lalrinawma, Under Secretary Pu Lalhmahruaia Zote leh Under Secretary Pu Lalthanzama ten training an neihpui a ni.