NLUP sum lut leh chhuak felfai leh zuala enkawlna tura E-Banking ruahmanna chu vawiin khan Chief Minister Pu Lal Thanhawla, NLUP Apex Board Chairman, hovin NLUP Implementing Board(NIB)conference hall-ah thlir ho a ni a. E-Banking atana State Bank of India, Mizoram-in ruahmanna a duan chu NLUP-a mawhphurtute leh hma la tu hrang hrang te nen sawi ho a ni.

Chief Minister chuan ram hmasawnna tur programme hrang hrang te chu mipui tam thei ang berin an chhawr theih tura duan leh felfai leh langtlang taka kalpui zel hi sorkar duh dan a ni a ti a. NLUP atana E-banking ruahmanna chu awlsam taka sum dinhmun hriat zung zung theih nan te, lang tlang taka sum hmanna en theihna tur te, sum lut-chhuak chak zawka a kal theih nan leh hei hi thingtlang kilkhawr ber thlenga beneficiary te tan awlsamna thlentu a nih beiseina nen duan a ni tih a sawi a. Hemi rual hian internet service provider leh electric mumal loh vanga harsatna awm thei te thlir tel a tul thu pawh a tarlang a. Ngun taka ngaihtuah leh sawiho hnuah Chief Minister chuan e-banking chungchanga harsatna awm theite thlir telin hemi chungchang zir chiang tur hian district tinah District NLUP Implementing Committee Chairman te, line department leh SBI official te telna Committee hran din ni se, a ti.

Vawiin-a e-banking chungchang sawihona ah hian Ramhlun “S” YMA ten NLUP hla, Pu K.Lalthlengliana phuah, sa a music video an siam chu Chief Minister hian a tlangzarh nghal a. NLUP chungchanga infuihna thuchah tha tak hla leh rimawi hmanga YMA ten an puang chhuak chu Pu Lal Thanhawla chuan lawmawm a tih zia sawiin NLUP ah hian tu tan mah inthlahrunna tur a awm lo a ti a. NLUP hi ram leh hnam din thar leh nana thil pawimawh a nih hria in Synod Social Front leh Baptist Kohhran te pawhin zirchianna an nei mek a. Heng atang hian a dawngtu tam berin an hlawhtlin pui mek tih hriat a ni, a ti a. Hetianga sorkar hmalakna ngaihven a, NLUP hlawhtlin na tura tha leh ngaihtuahna tih tak zeta an senna ah Kohhran, YMA leh NGO hrang hrang te chungah lawmthu a sawi nghal a ni.

E-banking sawihona hi Pu R.Selthuama MLA, NIB Chairman in a kaihruai a. Vice Chairman NIB, Pu P.L.Thanga’n e-banking pawimawhna leh a thil tumte a sawi a. State Bank of India Mizoram aiawhin Pu Lalthuamliana’n presentation a nei bawk a ni.