National Water Policy zulzuia State Water Policy siam turin vawiin khan Chief Minister Pu Lal Thanhawla hovin NLUP Implementing Board Conference Hall-ah State Water Resource Management Committee chu thukhawmin, thil tul pawimawh an tihte an sawiho.

Meeting-a thuhma a neihah Chief Minister chuan tui thianghlim indaih lohna kan tawng chho mek a, khawvelah India chu tui thianghlim in tur ah a pachhe ber a ni, a ti a. Tun hnaiah YMA te nen tangkawpin ‘Tuihna Humhalh’ beihpui kan thlak mek bawk a ni tiin, Mizoramah ruahtui hi tui kan hmuhna hnar ber anih avangin a khawl dan te kan zira kan thiam a tul a ni a ti. Chumi tur chuan mihringte hnenah chauh nilo, ramngaw, thing leh mau, khawmual leh chungleng savate leh luia chengte hnenah chanchintha kan hril a ngai a ni a ti.

Committe-ah hian PHE department in State Water Policy a ruamhman chhin, a draft chu siam that leh belh tur tul an tihte chu a hna ataka thawktu tur, working committee ruata, chumi chuan lo bawhzui mai se an ti a ni.

Committee-ah hian PHE Minister Pu S.Hiato, Parliamentary Secretary Pu Lalthanzara te bakah department hrang hrang Secretary to GOM leh sorkar department hotute an tel a ni.