4237/2025-2026

Dated Aizawl, the 30th January, 2026: Vawiin khan Pu Lalbiakzama, Speaker, Mizoram Assembly chuan Former Legislators Association of Mizoram (FLAM) Annual General Body Meeting chu Assembly Conference Hall-ah khuallian niin a hmanpui.

Khuallian Pu Lalbiakzama chuan thu sawiin, FLAM hmasawnna te leh an hamthatna tur atana sawrkar hnathawhte a tarlang a. Deputy Speaker designated bungalow tur chu a hmun ruahman felin sak tan mai tura tih fel a ni tawh tih leh MLA Hostel hlui pawh thiah fel ani tawh a, SASCI sum hmangin sak a ni thei dawn a, amaherawhchu a hmun tura duana theizuarte chuan an insawnna tura ruahmansak an duh lo a, mihring inlainatnain ngaihchan mek an nih thu leh a tul anga bawhzui a nih tur thu a sawi a. Assembly House thar sakna tur hmun hma tha zawn mek a ni a, plan leh sum senso ngaizat tur te kan ruahman chho mek a ni, a ti bawk.

Speaker chuan Politician te chu sorkar hnathawk anga hna atanga ‘retire’ mai thei an nih loh thu leh tuna an chawlh rih avang maia chawl hlen tur an nih lo tih sawiin, ram veia ram tana thawk zel tura intuaihriam reng turin a fuih a. Mizoram chu thalai lehkhathiam tamna, First Fully Literate State-a puan tawh a ni a, he’ng thalai lehkhathiam zinga hna hmu lo tam takte tana eizawnna ngialnghet siam a ngaih pawimawh thu leh, Tourism lamah te leh Bana Kaih Policy leh thil dang hmanga khaichhuah an ngaih thu a sawi bawk.

Prof. JV Hluna, Vice President-in inkhawm a kaihruai a, Pu PP Thawla, Executive Member-in hunserh a hmang a, Pu Rochhunga Ralte,  Treasurer -in  sum  dinhmun  a  report  a,  Pu  TC Pachhunga  Gen. Secretary-in 2025 chhunga FLAM chetvelna a report bawk. Associate Member thi pathum -

1.    Pi Agnes Dengchhungi Wlo A. Thanglura

2.    Pi Lalrinawmi W/o C. Ramhluna

3.    Pi Sikulthangi W/o Sainghaka

te sunna hun hman a ni a.

Pu Liansuama, President chuan palai lo kalte  lawmin chibai a buk a. Kum 1972 UT  MLA te zingah mi 7-in an la dampui  chu lawmawm a tih thu a sawi a. FLAM-ah chuan Political Party hrang hrangte awm mah se Party politics tuma’n an pu lut ngai lova, an thawhhona a tha a, an inpumkhat tih a sawi a. Ram tana tha tur nia an hriatah theihtawp chhuahin hma an la thin a, an la zel bawk dawn a ni, a ti a. Thalaite, a bikin mipa thi an tam ta lutuk chu a tlem theihna turin ralpui phiara phiar a, tan an lak a ngai a ni tiin, mithiamte lengah sawmin an sawipui tawh a, a tul ang zela an beih tur thu a sawi a ni.

Kum 2026 - 2028 chhunga hruaitu thlanna neih a ni a. Heng mite hi chuhtu awm lova thlan tlin an ni.:- 

President - Pu Liansuama 

Vice President - Prof. JV Hluna 

Treasurer - Pu Rochhunga Ralte

Pu John Rotluangliana, Gen. Secretary-in lawmthu sawiin hun a khar a ni.