December ni 9, 1986-a din tan Leitan Branch YMA chuan vawiin khan Leitan YMA Hall-ah Silver Jubilee lawmna an nei a, bialtu MLA Assembly Speaker Pu R. Romawia’n a hmanpui a ni.

Silver Jubilee Lungphun a hawn hnuah Speaker Pu R. Romawia chuan thu sawiin thangtharten YMA tia kan hriat mai hi, tobul chhuitham thui tak a nei a, vawiinah chuan pawl ropui tak, Mizo hnam hlawmkhawmtu ber a ni ta a ni, a ti. YMA hnathawh ropui tak tak te sawisen a ni lo tiin Pu Romawia chuan kohhran leh politics pawhin an tih thei loh, Mizo hnam leh khawtlang nun hlawmkhawmtu a ni a, Mizo zawng zawngte lenna pawl a ni thei chu a chhuanawm tak zet a ni, a ti bawk. Leitan Branch YMA te chu Silver Jubilee duhsakna chibai bukin Speaker chuan Jubilee lawmpui nan Rs.10,000/- leh poly-tarpaulin 2 a pe bawk a ni.

Jubilee lawmnaa Khual Zahawm Pu Lalringenga Sailo, Councillor Ward No.1, Aizawl Municipal Council chuan Jubilee Souvenir tlangzarhin Leitan YMA member leh khawtlang mipuite Jubilee duhsakna a hlan a ni.

Leitan Jubilee lawmna inkhawm hi chawhma leh chawhnu hunah then a ni a, chawhnu inkhawm -ah Khuallian Speaker Pu R. Romawia-in Jubilee Lungphun hawngin, Leiten Branch member ram leh khawtlanga hmingthang leh ti tha te hnenah lawmman a hlan bawk a ni.