The Mizo Meet 2011 vawiina Kawnpui khelmual, Churachandpur, Manipur-a hmanna ah Chief Minister Pu Lal Thanhawla chu khuallian a ni. Khual zahawmah Art & Culture Minister Pu P.C. Zoramsangliana; E&F Minister Pu H. Rohluna te bakah Pu T. Phungzathang, Manipur Minister for Power leh Pu TN Haokip, Manipur Minister for I & PR te an ni a. Special Guest ah Pu Lalrinmawia Ralte, Parliamentary Secretary ; Pu Chawngtinthanga, Parliamentary Secretary leh President CYMA leh President MZP General Hqrs. te an ni.

Khuallian Chief Minister Pu Lal Thanhawla chuan Mizoram sorkar-in a ngaihpawimawh hmasakte chu miretheite chhanchhuah, eirukna leh hlemhletna um bo te, zirna lam tih hmasawn leh thalaite tan khawvel thar siama sports leh sipaia an in hman tam theihna kawng siam sak a ni, a ti a. Mizoramin a kan mamawhte chu inkalpawhna kawngpui siam te, railways leh Mizoram chhim lama thlawhna tumhmun thar airport siam te leh kawlphetha hnianghnar taka kan neih theihna tur te an ni a. Mizo hnahthlak zawng zawng Manipur a mite, Tripura te leh Burma ram amite rorelna khat hnuaia kan awm hi kan duhthusam a ni, a ti a. Chief Minister chuan Zo hnahtlak zawng zawngte chu Pathian tih chungin inngeih tak leh ralmuang taka khawsa ho tura chahin midangte tan entawn tlaka awm turin a fuih bawk a ni.