6th Shito Ryu Seiko Kai National Karate Championship 2012 chu vawiin khan Assembly Speaker Pu R Romawia’n Luangmual Indoor Stadium-ah a hawng. Ni thum awh (18th – 20th January 2012) Championship hi All Mizoram Karate Association(AMKA) in North Eastern Council puihna in an buatsaih a ni.

Pu R Romawia chuan martial art hrang hrang Karate, Judo, Kungfu, Taekwando leh a dangte chu Asia khawmual atanga a chhuah thu sawiin heng martial art ten an tum ber chu midang tina lova, mahni leh mahni inveng thei tura inzirtir leh inkaihhruai a ni a ti a. Karate chu taksa sawizawina piah lamah rilru thlengin kaihhruaina tha a pek thei thu a sawi bawk a ni.

Speaker chuan tunlai khawvel ah mahni intihhlum an pung chu pawi tiin karate chuan mihring rilru ah thui tak hna a thawk thei a, rilru leh ngaituahna thar pein, thil duhawm – mahni intihhlum, ruihtheih thil leh nun kawng dik loh hrang hrang lakah mihring a ven theih thu a sawi a ni.

Championship ah hian State panga – Mizoram, Sikkim, Nagaland, Arunachal Pradesh leh Assam bakah Assam Rifles atangin infiammi 150 chuang an rawn tel a ni. Championship hi live in DDK Aizawl chuan DD(North-East) channel ah an pechhuak dawn a ni.

Championship hawnna programme hi AMKA Senior Vice President Pu R Thanga’n a kaihruaia, T C Lalremsiama General Secretary All Mizoram Karate Association (AMKA) Gen. Hqrs. in Technical Report a pe a. Shihan Bharat Sharma, National Chief leh General Secretary All India Karate Federation ni bawk chuan thusawina hun a nei a. AMKA Technical Board in Demonstration an entir bawk a ni.

AMKA hi 1994 khan din niin Mizoram State Sports Council chuan 1996 a pawmpuina an pe a ni.