Rabindranath Tagore hi May ni 7 1861 ah a piang a, August ni 7 1941 ah a boral a. Amah hi mi ropui chungchuang India ramah West Bengal state ami a ni. Thu leh hla leh zai leh zairimawi ngaina leh thiam tak mi a ni a, chumi avang chuan heng lampangah pawh thahnem taka sulhnu lo nei tawh a ni bawk. Khawvelah khirhkhan taka Europe lam mi chauhvin Nobel prize an dawn fo thin laiin, Tagore-a hian 1913-ah Nobel Price in Literature a lo dawng ve ta hlauh mai a. hei hi a thiamna ril em em vang a ni. hemi prize a dawn avangin hnam dang, Europe mi lo, dawng hmasa ber a ni nghe nghe a ni. Tawng leh tawngleh (translation) a thiam hle bawk a ni.

Tagore-a hi a inthuam dan pawh a uchuak lova, dan tlangpuiin kawrfual var a ha a, a hmui leh khabe hmul sei takin a zuah a, hetianga inthuam leh inbel hian mawl takin a nun tam zawk chu a hmang fo a ni. Hetiang anga dangdai taka a inchei avang hian amah hi mi tam takin thlarau lam mi emaw/zawlnei ang hial ten an chhuah fo a ni. Tagore-a hi Kolkata khua ami a ni a, Piyali Brahmin a ni. Kum 8 a nihin thu leh hla a ziak tan a, kum 16 a nihin thu leh hla ama ziah chu lehkhabuah siamin, a chhuah nghe nghe a, ama hming Tagore tih hmang lovin ‘Bhanusimha’ (Sun Lion) tihin chu lehkhabu chu a chhuah a ni. Hemi hnu hian kum 1877 ah ama hming chuang ngeiin thu leh hlate, lemchan bu thahnem tak a chhuah ta bawk a. Tagore-a hi mithiam chungchuang a ni kan tih tawh kha, thuziak mai bakah, lemziakte, hla phuah te a thiam em em a. Hla phei chu 2000 dawn lai a phhuah a, thuziak pawh za chuang fe a nei. Visva Bharati University - Shantiniketan tiha hriat lar em em - ah hian ama sulhnu thanhnem tak a awm bawk a ni. Amah hi ram pahnih national anthem (Hnam hla) phuahtu awm chhun a ni bawk a - India ‘Jana Gana Mana’ leh Bangladesh tan ‘Amar Shona Bangla’ (My Golden Bengal).

Tagore-a hian pianpui unau 13 a nei a, amah hi a naupang ber a ni. A pianna in chu Jorasanko Mansion tiha koh a ni a, a Pa chu Debendranath Tagore a ni a, tin a Nu chu Sarada Devi a ni. A nu leh pa an buai em em thin avangin amah hi an ina cheng, an awmpui ten an enkawl tam hle a. Vanduaithlak takin a nu chuan kum 1875, Tagore-a kum 14 a nihin a boralsan a. Tin, a pa hi mi zin veivak mi a ni bawk a, chuvangin Tagore-a chuan amah hringtu, a nu leh pa te hmel a hmu tam lo hle a ni. An chenna inah chuan chanchinbu chi hrang hran leh zairimawi lam a ri hnem hle a. An chhungkua hi mi changkang leh dinhmun sang tak tak awh pha an ni nghe nghe a, a unaute hi Indian Civil Service officer te, novel ziak thiam te, philosopher te leh zai mite an awm nual a ni. A unauten Tagore-a hi thil chi hrang hrang an zirtir hnem hle a, heng zingah hian tui hleuh te, tlang lawn te, infiamna chi hrang hrang te a tel a. Amah hian school-ah chuan subject chi hrang hrang : lemziah te, Geography, Anatomy, History, Maths, Rnglish, Sanskrit te a zir bawk a ni.

Tagore-a hian a dam chhungin hla 2230 a phuah hman bawk a ni. Kum 60 a nih khan Tagore-a hian lemziak hi urhsun takin a bawhzui ve thung a, ama lemziakte hi hlawhtling takin exhibition te neiin a pholang thin a  ni. France rama Paris-ah a lemziak te hi a pholang hmasa ber a. Tagore-a hi New Ireland leh Bristich Columbia rama thil thlengte a lemziakah hian a telh nasa hle a ni. A hla phuah thenkhat te pawh hi a lemziak te nena inchawih em ema hriat a ni bawk. Tagore-a hian Kala Bhavan a hawng a, chutah chuan Indian art hi a bik takin a pholang a ni. Amah hian lemziak lamah training/zirna pakhat mah a nei lova, chuvang chuan a thiam ang angin a ziak a, a huai em em bawk a, chuvangin lemziak khawvelah pawh thil ropui leh dangdai tak tak a pholang fo a, sulhnu ropui tak a nei nghe nghe a ni. Ama lemziak 1500 aia tam hret hi tuna Visva Bharati, Shantiniketan-ah hian en theihin a awm a. Ama thil ziahah hian a rilru eh hawiher nasa takin a phawrhchhuak a ni. Ama lem a ziak (self-portrait) nasa hle a, hei hi mithiam te chuan amah leh amah nasa zawka a inhriatthiam theih nana a ziah angah an ring tlat a ni. Heng ama lem a ziah te hi nalh naran mai an ni lova, an ropuiin an mawi dangdai em em a ni. Rawng chawin dan te bakah thil chi hran hrang khawvel leh mihring chungchanga a hriatthiam loh te, ril taka a hriatthiam nan lemziah hi a hmang tangkai a ni. Ama tawngkam ngeiin “khawvel hian ka rawng chawih dan hian min bia a, mahse ka thlarau erawh chuan hlain a chhawn” a ti tlat a ni. Chuvang chuan thu leh hla leh lemziak hi Tagore-a khawvelah chuan hmun ril leh hmun sang tak a awh a ni.

Kum 1883-ah Mrinalini Devi nupui ah a nei a, ani nen hian fa 5 an nei a, 2 chu an nausen laiin, vanduaithlak takin an boral. Kum 1901 atanga kum 1932 hi Shantiniketan-ah a awm tam hle a. Mandir te a siam a, tawngtaina hi a ngai pawimawh hle a ni. He hmunah hian zirna in dangdai tak a siam a, thingkung leh phul nuam tak tak te leh library changtlung tak te a dah a. Hemi chhung hian Tagore-a hi a hlawhtling hle a, a lehkhabu ziakte hi mi tam tak, India ami leh foreign rama mite pawhin an lei a, an hlut hle a ni. A lehkhabu hralhna atang hian Shantiniketan te pawh changtlung zawkin a chei fo thin a ni. Tagore-a hi mi changkang leh nasa taka zin veivak mi a ni a. Kum 1878-1932 inkarah ram 30 leh thliarkar 5 a tlawh chhuak a, a thil ziak te hi mi tam tyakin an leh sak a, a lettu lar zual zingah chuan Irish poet W.B.Yeats te pawh an tel nghe nghe a ni. Mi ropui leh thiam Albert Einstein-a nen pawh ril taka inkawmna hun kum 1930 khan an nei.

Rabindrasangeet (Tagore-a hla) tiha hriat lar phei hi chu vawiin thlengin khawvel huapa hla phuah lar leh mawi te zingah an tel a. Tagore-a hian a damchhungin novel 8 leh thawnthu tawi 4 a ziak a, a lar zual te chu, Ghare Bhaire - The Home and the World leh Gora tih te hi a tel a ni. Tagore-a hi kum 1915-ah Knighthood hlan a ni a, British lalpa King George V-a’n he chawimawina hi Tagore-a hnenah a hlan a ni. Politics lamah te pawh a duai lova, Indian nationalism kha nasa takin a thlawp a ni. British lal te kha theihpatawpin a do ve a, India hmasawnna daltu angah a ngai tlat a ni. hetih hun lai hian amah lo haw pawl an tam a, British chawimawina Knighthood pawh a kir leh phah a ni. Hemi chhung hian hla tha tak tak India zalenna tura hmalakna atan a phuah a, an zingah chuan a lar pawlah; “Where the mind is without fear” tih leh “Ekla Chalo re” (Walk Alone) tih te a ni.

Tagore-a hi mithiam chungchuang leh mi ril, ama hun lai chau ni lovin vawiin ni thlenga khawvel huapa mi hriat hlawh leh mi ngaihsan a ni a. A boral hnua pawhin tun hun thlenga urhsun takin chawimawina hlan a ni tlat a, hetiang mi hi khawvel mihring zingah an tam klo hle. Kum tin a pian leh thih ni hian mi thahnem tak amah chawimawi tur leh a sulhnu te chibai buk turin khawvel hmun hrang hrangah an inhmukhawm thin a. Heng vang leh thil dang tam tak avangin Tagore-a hi a duai lo hle a, “India’s Greatest Poet” tiha mi tam takina an koh theih hialin vawiin ni thlen hian amah hi kan chawimawi a ni.