Mizo Cultural Organisation (MCO) chuan vawiin nileng khan Art & Culture Auditorium, Berawtlang, Aizawl-ah an Silver Jubilee lawm pahin General Assembly an nei a, Speaker Pu Lalrinliana Sailo chuan khuallian niin he hun hi a hmanpui a, Art & Culture Department Director Pu R. Hmingthanzuala chu khual zahawm niin kum 2020-2022 chhunga an pawl hruaitu tur te an thlang nghal a ni.

Khuallian chuan MCO member kalkhawm hmaah thuchah sawiin Silver Jubilee duhsakna a hlan a. Khawvel ram hrang hrang engemawzat a tlawh tawhna ah ramdang miten an hnam tihdanphung leh nunzia an zahpuilohzia a hmuh thin thu a sawi a, mizote pawh hetih kawngah hian kan harhchhuak deuh deuh zel a ni a ti. Khuallian chuan khawvel inlumlet zel dan tur a hriatloh a, zohnahthlakte kan inpumkhat hun hi a la thleng ngei dawn a ni a ti a, hemi atan hian MCO te an pawimawh em em a ni a ti.

Pu Lalrinliana Sailo chuan Mizorama cheng duhlian tawng hmangte hian zohnahthlakte inpui kan nihna hi kan rilru leh mit timengtu nise a duhthu sawiin, zohnahthlak zawng zawngte kan thlazar hnuaia an len vek theihna turin ngaihtuahna kan sen a ngai a ni a ti a. Zohnahthlakte culture leh tradition te chawi nun zel kawngah theihtawp chhuah zel turin MCO member te a ngen a ni. Duhlian tawng hmang ten zohnahthlak hnam bil tawng hmangte kan ngai mikhual deuh hlek thin ni a a hriat thu sawiin hei hi kan inpumkhatna daltu a ni thei a ni a ti a, hetiang rilru pu te chu sim hmak turin a chah a, kan hnam incheina kan ngaihhlut a tun aia kan chawisan lehzual theih chuan zohnahthlakte min huikhawmtu tangkai tak a ni thei tih sawiin zofate inpumkhatna rilru a vei reng zel turin MCO member te a chah a ni.

Khualzahawm Pu R. Hmingthanzuala pawhin thu sawiin mizote hi Pathianin ze bik neiin min siam a, tihdanphung leh nunphung nei turin ram bik min pekah min dah a, hnamdang tihdan thalo entawn tur kan nilova, kan hnam zia leh nun zemawi chhawm nun zel hi kan tihtur a ni a, hetih kawngah hian MCO ten an thawhhlawkin an hmalakna a lawmawm hle a ni, a ti.

Vawiin General Assembly hi hun thumah then niin Then khatna ah rorel inkhawm neih a ni a, hetah hian kum 2020-2022 chhunga an budget ruahman sawiho a pharh a nih bakah an pawl inkaihhruaina dan thenkhat ennawn a siam that a nih bakah hmalakna tur thil chi hrang hrang an ngaihtuahho a, Then hnihna ah MZP General Headquarters hruaitute kaihhruaiin kum 2020-2022 chhunga MCO hruaitu turte thlan a ni a, an hruaitu thlan tharte chu :

President  : Pu Robert Romawia Royte, Chhinga Veng

Vice-President : Pu John Saikhuma, Zonuam

General Secretary : Pu Lalbiakhlua, Chanmari West

Secretary : Pu Lalchhuankima, Bethlehem Vengthlang

Treasurer : Pi Lalnuntluangi, Vaivakawn

Finance Secretary : Tv. C. Lallawmsanga, Dinthar

Then thumna hi MCO Silver Jubilee kharna inkhawm atan hman niin Assembly Speaker Pu Lalrinliana Sailo hova hman a ni a. MCO Souvenir khuallian Pu Lalrinliana Sailo chuan a tlangzarh a, MCO hruaitu hlui mi 24 hnenah chawimawina thuziak hlan a ni.

Mizo Cultural Organisation hi kum 1993 February ni 13 ah Aizawl khawpui chhunga Cultural Club pasarih kalkhawmin an din a, Art & Culture Department chu Nodal Department ah neiin tun dinhmunah hian Aizawl khawpui chhungah branch/Club 66 an nei a, Sub-Headquarters pali - Kolasib, Champhai, Serchhip leh Mamit an nei a, hei bakah hian Group Headquarters pahnih Khawhai ah leh Chhawrtuiah an nei bawk. Sub-Headquarters leh Group Heqdquarters zawm remchang lo thingtlang khaw engemawzatin direct in General Headquarters an zawm bawk a ni.

Mizo Cultural Organisation hian a tum ber chu Mizo hnam ziarang humhalh te, Mizo hnam zai leh lam te humhalh a tihhmasawn te, thangthar lo awm zel te hnena zirtir chhawn te hnam inpumkhatna vawn nun te a ni a. Mizo hnam ziarang chi hrang hrang te lam leh zai hmangin an phochhuak thin a, Tourism Department nen pawh thawkhovin India ram hmun hrang hrangah Cultural Troupe an tirchhuak thin a ni.