Vawiin chawhma dar 11:00Am khan DC Conference Hall-ah Pu H. Zonunmawia, Election Officer kaihruaina hnuaiah State Day chu ropui leh urhsun taka lawm a ni.

He State Day lawmna a khuallian Pu Malsawmtluanga, Additional Deputy Commisioner chuan thu sawiin, kum1986 june 30-ah India sawrkar leh Mizoram chuan remna thuthlung an ziak a, kum 1987 Feb 20, vawiin ni angah hian remna tluantling leh State kan neihna ni chu siam fel a lo ni ta a ni, a ti a. He ni hian hmuntin a zofa chengte chu min phuarkhawm zual sela, hnamtin te chungah remna leh in unauna a tharin thlentir leh tum theuh ang u, a ti.Kan nitin nunah rinawmna leh taimakna hi vawngnung zelin, hmangaihna leh tlawmngaihna pawh chhawmnung zel ang u,  tiin kalkhawmte chu a chah hlawm bawk. Sawi zelin, Pu Malsawmtluanga chuan Ram hmangaihna thinlung pawh a tharin min puttir sela, kan ram zimte hi duat a, kan hmangaih hle a ngai a, kangmei lakah pawh tikangtu ni lovin, thingtiak phuntu nih tum zawk ila, faina kawngah pawh sawrkar hmalakna reng reng puitu nih tum turin leh tifaitu nih tum theuh turin vawiin a kalkhawmte chu uar takin a chah hlawm a ni.

Rev. Dr. Lai-u Fachhai, Senior Executive Secretary, ECM Hqrs chuan  hunserh a hmang. 

Vawiin State Day lawm tura kalkhawmte chuan urhsun takin Hnam hla (National Anthem) sa rualin, Chhimtuipui Group YMA Choir te chuan hawnna hla 'Ro min rel sak ang che' mawi takin an rem bawk a ni.

Pu H. Zonunmawia, Election Officer, Siaha District, Siaha chuan lawmthu sawiin vawiin State Day lawmna programme hi a titawp a ni.