Vawiin khan Mizoram hmun dangte rualin Champhaiah State Day  lawmna  chu I&PR Auditorium, CHANEM-ah  hman a ni.

He hun hi District Bawrhsap Pu SL Naveen, IAS chuan a kaihruai a, Bawrhsap chuan ramri leh ram dinhmun chu ala inthlak fo dawn a,  a pawimawh ber chu Pathian hruaina kan dawn hi a ni, a ti a.  Mizoram in Assam atanga a indan hnu atangin hmasawnna kawng tam tak a neih tawh tih sawiin,  zirna lamah nasa lehzualin hma a sawn thu a sawi a. Champhai ah pawh hmasawnna kawng tam tak hmuh tur a awm tih a  tarlan rualin  ruihhlo do kawngah pawh nasa taka hmalak a ni a ti. Ruihhlo do kawngah sawrkar bakah NGO hrang hrang te chuan tha nasa takin an thawh tih a sawi a. HIV/AIDS do kawngah pawh hmasawn zel tura hmalak a nih thu tarlang nghalin NGO hrang hrangte chu thawhpui ah a sawm nghal a, tlawmngai pawl hrang hrangte'n khawtlang tana nasa taka hna an thawh tawh thinna chu ropui a tih thu a sawi a. Tlawmngai pawl inpekna chu ram dangah ala hmuh ngai loh thu sawiin,  chhawmnung zel turin a chah nghal a ni.

Thusawitu dang Pu P. Lalhmingliana, Principal Govt. Champhai College chuan thu  Remna Ni leh State Day chu thil inzawm tlat a nih thu a sawi a. Pu P. Lalhmingliana hnen atang hian Mizoramin State dinhmun aneih dan leh remna leh muanna nei tura hmalaknate ngaihthlak a ni bawk.

Vawiin State Day lawmna hun hi Pu Mark Lalthanliana, Addl. DC chuan lawmthu sawiin hun a khar a ni. He hunah hian Sawrkar Department hotute, NGO leh khawtlang hruaitute an tel a ni.