Vawiin khan Khawzawl Electric Veng YMA hall-ah Khawzawl Addl. DC Pu  Paul L Khuma hovin Mizoram State Day urhsun taka hman a ni.

Vawiin State Day lawmna inkhawm hi Khawzawl BDO, Dr Saithangpuia'n a kaihruai a. Khuallian Pu Paul L Khuma chuan thu sawiin, vawiina Mizoram State Day lawmna neih hi Khawzawl District tan chuan a tum khatna a nih angin hun lo la kal zel turah pawh a nung reng dawn a ni, a ti a. Pu Paul L Khuma chuan, US President hlui John F Kennedy khan "I ramin enge a tihsak theih che tih ngaihtuah lovin, ka ram tan enge ka tih theih tih ngaihtuah zawk rawh" a tih ang khan kan ram tan tih theih kan nei em tih te kan ngaihtuah a tul a; nu leh pa ten fate tha taka kan enkawl hian khua leh tui kan nih anga kan tih theih thil tha tak kan ti a ni, a ti a. Kan fate kan duat lutuk avang hian khua leh tui thaah kan chhuah lo mai ang tihte a hlauh awm hle a ni a ti bawk.

Khuallian chuan, Sorkar hnathawkte pawhin ram tan leh khawtlang tan tih tur tam tak kan nei a, Sorkarin ti tura ruahman a siamte tha taka zawm mai hi kan tih tur a ni a. Pisa kai hunbi a kai te, ban hunbi dik taka bante hi sorkar hnathawk te tih tur a ni a, khua leh tui kan nih anga kan mawhphurhna a ni, a ti a. Sorkar hnathawkte eirukna laka kan fihlim hian khua leh tui tha kan ni mai, a tih bakah, Sorkar hnatawkte hi mipuite tana thawk kan nih angin mipui thatna tura rim taka thawh hi kan ram tana kan tih tur a ni, a ti bawk a, Zirlaite pawh mahni zirlai tha taka zir hi khua leh tui tha ni tura thil pawimawh tak a nih thu a sawi bawk.

He hunah hian Khawzawl District Village Council  Association President Pu Zoremsanga'n thu a sawi bakah Suprintendent of Police, Pu PC Lalchunglura'n lawmthu sawina neiin hun a khar a ni. He inkhawmah hian 2nd IR Batallion Pipe Band ten hnamhla an sak bakah, BSI Khawzawl branch Zaipawlte, mimal zaite ngaih thlak a ni bawk. State Day lawmna inkhawmah hian Khawzawl khawpui chhunga sorkar department hranng hranga thawktute an kal khawm a ni.