Vawiin chawhma dar 11:00 khan DC Conference Hall, Lungleiah Mizoram State Day, 2020 lawmna hun District Bawrhsap Pu V. Lalsangliana, IAS hova neih a ni. State Day lawmna ah hian Lunglei District head of office-te, tlawmngai pawl hrang hrang aiawhte, political party hruaitute, media mite leh sawm bik dang mi thahnem tak an kalkhawm. 

Khuallian chuan kalkhawmte Mizoram State Day chibai bukin remna leh muanna vawng nung a, ram hmasawn nana bei zel turin District mipuite a chah a. Sawrkar hnathawk kalkhawmte pawh thahnem ngai taka ram leh hnam hmasawnna tura theihtawp chhuah chhunzawm zel tura chahin tlawmngai pawl, media leh political party te nena thawhhona tha tak chu chhawmnung zel turin a sawm a ni. 

Lungleia State Day lawmna hun Additional DC R.Vanrengpuia kaihhruaiah hian Lunglei DLAO Pu J.Miahlung hunserh a hmang a. Dr Malsawmtluanga, Asst Professor Lunglei chuan Powerpoint Presentation hmangin ‘State Day lo pianchhuah dan leh hmasawnna kan neih tawh dan’ tih thupui hmangin zirtirna hun a hmang a. Lunglei SDC Pu Collin Hlychho chuan lawmthu sawina hun a hmang a ni. State Day lawmna thingpui ruai kil ho niin, hun tihtawp a ni.

Attachment

  • Loading attachment...