India ram state puitlinga Mizoram hlan kai a nih champha phak 33-na chu vawiin khan Lawngtlai DC Conference Hall-ah lawm a ni a. Bawrhsap Pi Shashanka Ala, IAS chu Khuallian a ni.

Khuallian, Lawngtlai Bawrhsap chuan February ni 20 chu Mizoram State Day a nih mai piah lamah Lai Miphun Ni (Chin National Day) a ni bawk a, Zo hahthlakte tan ni pawimawh tak a ni tiin, mipui kal khawmte chu duhsakna chibai a buk a. Remna leh muanna vawng nung a, ram hma sawn nana bei zel turin District mipuite chahin, District chhunga hnam hrang hrangte'n inpumkhatna leh thawh hona tha neih zel tum turin a chah.

Lawngtlaia State Day lawmna hun hi Additional DC Pu K. Laltlawmlova, MCS chuan kaihruaiin, kum 1986 June ni 30-a MNF leh India sawrkarin Remna Thuthlung an ziah fel hnua kum 1987 February ni 20-a Mizoramin state nihna a neih chho dan a sawi a. Grace Harmony te'n inhlan thar nan "Ro min relsak ang che" tih hla sain, an zai chhung hian kal khawmte'n ding chungin an lo zawm a. BCM Lawngtlai Area Executive Secretary Rev. R. Lalnunzira'n hunserh hmangin, Pathian hruaina avanga Mizoram chu state dinhmun luah thei leh India rama state ralmuang ber kan nih thu te, rinna leh hna thawhna kawngah puitlin lam pan zel tur kan nih thu te sawiin, Pathian hnenah a tawngtai a. Zai thiam zai te ngaihthlak niin, SDO (Sadar) Pu V. Lalruatliana'n lawm thu a sawi a. State Day lawmna thingpui ruai tuihnai tak kil ho niin, hun tihtawp a ni.

Vawiina Lawngtlaia State Day lawmnaah hian state leh LADC hnuaia officer-te, tlawmngai pawl hruaitute leh DC office staff-te an kal khawm a ni.