Vawiin chawhma khan Parish Hall, Kolasibah 33^rd Mizoram State Day lawmna hun hman a ni a, Pi Sangchhin Chinzah, Deputy Commissioner Kolasib chu khuallian niin Kolasib district chhung a sawrkar hotute leh tlawmngai pawl hrang hrang hruaitute an tel a ni.

Pi Sangchhin Chinzah chuan Mizoram in State puiting dinhmun a luah theih nana hruaitu hmasa te hmalakna pawimawh zual te tarlangin, 1966 atanga 1986 chhung sipai thuneihna hnuaiah mizote chu harsatna nasa tak tuar a kan awm thu a sawi a. Ni 30th June 1986 ah Sawrkar laipui leh MNF ten Memorandum of Settlement siamin inremna an ziah hnuah Mizoram chu State a lo nih tak thu a sawi bawk a ni, “He Memorandum of Settlement -ah hian Pu Laldenga MNF President te; Pu RD Pradhan, Union Home Secretary te; Pu Lalkhama, Mizoram Chief Secretary ten hming an ziak a ni” a ti.

Deputy Commissioner chuan State kan nih atanga kum 33-naah hian kan ram chhungah hmasawnna hmel tam tak kan hmuh rualin State dangin a min hriat lar dan duhawm loh tak tak a awm ve mek thu a sawi a, Cancer leh HIV+ kai zat atangte hian insiamthatna kawng thui tak zawh tur a la awm thu a sawi bawk. Khuallian chuan kan ram leh hnam venhim leh tih hmasawn nan leh ei leh bar a kan intodelh nan te, mahni mawhphurna theuh ah theihtawp chhuah zel turin kalkhawmte a chah a ni. 

He hunah hian Pu C Liankunga, Chairman, NGO Coordination Committee, Kolasib district chuan Mizo te chenna tur a Mizoram State min neih tirtu, kan hruaitu hmasate harsatna paltlang hrang hrang te leh inpekna ropui tak tak te kan rulh let ve theihna chu thinlung leh tihtak zet a mahni hnaa rinawm a, ram leh hnam hmasawnna atan a kan theihtawk chhuah ve hi a ni, a ti.

State Day lawmna hun kaihruaitu Pu Vanlalchhuanawma Chawngthu, SDO(Sadar) chuan State dinhmun kan chuan kai theina tur atana kan pi leh pute tuarna leh harsatna hrang hrang an paltlang te theihnghilh lo tur leh, he ni pawimawhna te kan tu leh fate hnena zirtir zel a tul thu a sawi a ni. Project Veng Branch YMA zaipawl ten zai an rem a, St Maria Pipe Band ten rimawi te tumin Pi R Lalnunkimi, SDC in kalkhawmte lawmna thu sawiin hun a titawp a ni.