Vawiin khan Vanapa Hall-ah Mizorama State Day lawmna hun hian ber chu hlawhtling taka hman a ni a. He hunah hian Governor P.S. Sreedharan Pillai chu khuallian a ni a. Chief Minister Pu Zoramthanga leh Council of Ministers, MLA rual, sawrkar hnathawkte leh  Hnam Sipai lo ni thin te bakah mipui thahnem tak an tel a ni.

Kum 1986 June 30 khan India sawrkar leh Mizo National Front (MNF) te chuan inremna thuthlung, Mizoram Peace Accord tia hriatlar chu an ziak fel a. He inremna anga tihhlawhtlin tur a nih angain Mizoram chu kum 1987 February 20 khan Union Territorry atangin State puitlingah hlankai a  ni a. Vawiin hi he ni pawimawh tak thlen champha vawi 34-na a ni. 

Governor P.S. Sreedharan Pillai chuan state puitlinga inhlangkai tura Zalenna insualtute inpekna thuk tak te, Mizo mipuite thlawpna, thawhrimna leh tawrhna zawng zawng chhutletin “Mizoram State Day” hi a hlu  em em a, ropui taka lawm a phu hliah hliah a. He Ni chhinchiah tlak takah hian Mizoram mipuite hnenah duhsakna leh lawmpuina a hlan a ni a ti. Governor chuan, “ Kan state hlawhtlinna atanga lo lang chiang em em mai chu tunlai khawvel buai takah pawh hian a ram mipui ten an duh a;hruaituten tharum thawhna aia remna leh muanna an dahsan phawt leh thlah lova an vawt tlat chuan remna tluantling a awm thei a ni. Remna leh muanna  neitu kan nihna hi kan chawisang anga; hmasawnna kawngah pawh chak zawka ke pen zelin state zahawm kan nih tawh bakah state intodelh nih tel kan tum tur a ni”, a ti. 

Tehkhawng thenkhatah Mizoram chu titha thawkhatin chhuanawm hle mahse tanlakna tur lai a la tam hle a inthladah a thiang lo va. A bikin hmasawnna kawnga tanlakah sawrkar hnathawkte chu hmahruaitute leh mipui kaihruaitu an nih angin mawhphurhna sang zawk pek an ni a ti. “Ministry in hmathlir, hmachhawp leh tih hlawhtlin tur chiang tak nei mahse sawrkar hnathawkte tello chuan hmalak a theih lova. Chuvangin, state puitlinga hlankai kan nihna champhaah hian sawrkar hnathawk zinga a te ber atanga lianber thlengin taima tak leh phur taka thawk chhunzawm zel tura inhlan thar leh turin ka ngen a ni”, a ti.

Governor chuan state intodelh nih tumin hma kan la mek tih a sawi a. Central atanga sum lo kal ringawtah Mizoram chu a innghat lo telh telh dawn a. Nakin lawkah chuan kan tu leh fate pawh hmundangah te chhuah ngai lova; midangte rual awt lova, MIzoramah engkim inchhuang taka an hmuh a, an dawn theih vek hi kan duh a ni a ti a. Hemi ti thei tur hian state hauhsakna la haihchhuah loh te hi haichhuah zung zung tum a ni a ti. Kawng tamtakah Mizoramin theihna a nei a; a bikin horticulture, handloom & handicrafts, human resource, tourism, etc. te hian kan thang chak zual thei tih kan chiang tawh a ni a ti. Kumina kan state budget pawh lungawithlak a tih thu sawiin state dangten deficit budget an kalpui mek laia Chief Minister leh a thawhpui ten Surplus budget an rawn chhawpchhuak thei chu a phurawm tak zet a ni a ti a. “Hetih lai hian Central Sawrkarin India rama michenga chhuta mihring 3.5% lek, India Hmarchhaka chengte tan India Sum neih zawng zawnga zinga 10% a dah hi a tam tham hle tih kan hriat a ngai a. A haichhuah kawngah pawh tuna kan thlen chin hi a la tawk lo hle a; state dangte aia chak zawka kan hnuhchhuah a ngai a ni”, a ti.

Kum 34 a upa state kan nih tawh avangin kum lam zawnga chhut pawhin state puitling kan ni tawh tih a sawi a. Kan tana tha tur leh thalo te thliar thiam rual kan nih tawh lain kan hmelma zu leh  ruihlo bakah  inthlahdah avanga natna vei theih AIDS/HIV, Cancer, Thisensang, Zunthlum leh adangte  do kawngah erawh chuan tharum thawh takmeuh a hun tawh a ni a ti. “Heng thilte hian ka thlen chin tur te min thlen tir lovin min hnukhniam mek a; ralphiara kan phiara, awmze nei taka kan do tlan theih nan kohhranmite leh tlawmngaipawlte zawng zawng a bo a bang awm lovin sawrkar thawhpuiah ka sawm a ni”, a ti.

Chief Minister Pu Zoramthanga, remna leh muanna awm theihna tura sultute zinga mi chuan Mizoram tana ni pawimawh bik state piancham lawm tura kalkhawm zawng zawngte chibai a buk a. He ni chhinchhiahthlak tak hi harsatna tam tak paltlang hnu a chang thei kan ni tiin Chief Minister chuan Mizoram in state nihna a chan theihna tura remna sualchhuah a nih dan te, mipui, kohhran leh NGO te hmalakna leh sawrkar laipuia hmalakna te a sawi a. Mizoram chu hmasawnna kawngah leh remna kawngah state dang leh ram dangte tana entawntlak tura hmalak chu a chhung a chengten hma kan lakna tur a ni, a ti. 

Vanapa Hall a State Day lawman inkhawm hi Pu Lalnunmawia Chuaungo, Chief Secretary chuan a kaihruaia. He hunah hian Pu Vanlalruata, Chairman, NGO Co-ordination Committee pawhin thusawina hun a hmang a. Pu J.C. Ramthanga, Addl. Chief Secretary chuan lawmthu sawiin programme a khar a ni.