Vawiin chawhma dar 10:30 khan DC Conference Hall, Serchhipah Mizoram State Day, 2020 lawmna hun District Bawrhsap Dr. Lalzirmawia Chhangte, IAS hova neih a ni.

Bawrhsap chuan thusawiin, Mizoramin State dinhmuna kan ram hlankai anih hriatreng nan February ni 20 hi State Day tiin sawrkarin ni pawimawhah a puang a, vawiina State kan nih champha kan lo lawm leh thei hi Pathian min hruaina a ni a, a lawmawm em em a ni, a ti. MNF leh India sawrkar inremna Memorandum of Settlement chu ni 30.6.1986 ah ziah niin, chu inremna chu Mizoram chu UT ni tawh lova, State puitling anih tawh tur thu a ni a, tichuan, ni 20.2.1987 ah The Constiution (fifty-third Amendment) Act 1986 angin State puitling kan lo ta a ni, a ti a. State kan nih hnuah hlawkna tam tak kan nei a, Mizo thalaite zirna lama khawvel tukhverha an dahchhuah ve na tur Mizoram University kan nei te, Inrema thuthlungin chiang taka a tarlan angin chimral kan nih loh nana kan inhungbikna tur Inner Line Regulations hman a ni ta zel te hi thil chhinchhiah tlak tak anih thu a sawi bawk. India ram chhunga sawrkar inrelbawlna kan neih san theih ber State dinhmuna kan ding hi a lawmawm hle a, hei bak chu beisei tur a awm chuang lo a ni, tiin, State kan nihna in hamthatna tam tak min pek rualin mawhphurhna tam tak a keng tel a, kan ramin hma a sawn zel theih nan mipuiten kan mawhphurhna hi puitling taka kan hlenchhuah a tul a, sawrkar hi mipuite ta, mipui rawngbawltu ani a, mipuiten ral thlir mai lovin, neitu rilru pua sawrkar tawiawm tlat zawk turin mipuite a sawm bawk a ni.

He hun hi Pi C. Lalduhzuali, MCS, SDO (S) Serchhip chuan a kaihruai a, State ni pawimawh tak lawmna huna lo kal sawrkar hnathawkte chu sawrkar laka kan rinawmna ti langtute an ni a, lawmawm a tih thu a sawi a. Pu Samuel Zodinsanga, MCS, SDC chuan lawmthu sawina hun hmangin he hun hi khar a ni.