Vawiin khan Siamliana Hall, Mamit-ah Mizoram State kan nih champha Vawi 33-na urhsun taka hman a ni a. Dr. Lalrozama, IAS, Mamit District Bawrhsap chuan khuallian niin he hun hi a hmanpui.

Khuallian chuan kalkhawmte Mizoram State Day chibai a buk a, Mizoramin mahni ke a kan din ve theihna tura sul lo sutute chungah leh Pathianin Zofate min hriatrengna chu lawmawm a tih thu a sawi. Kum 33 lai mai State puitlinga hlankai kan lo ni ve ta chu puitlinna rilru put thar zel nana kan hman a duh thu a sawi.

Mizorama cheng zofate chu thuawih leh tihnuam taka kan awm chuan kan hmalam hunah hmasawnna tam takin min hmuak a, Sawrkar hnathawkte, Tlawmngai pawl hruaitute leh Khawtlang hruaitute chu kan theihna zawn theuhah ngaihtuahna sengin Mamit District-in hmasawnna hmel thar a hmuh theih nana tan la deuh deuh turin a sawm a ni.

He hunah hian Pu MS Dawngliana Hnamte, Principal, Govt. Mamit College pawhin thu sawiin Mizoram chu Zofate chen nana Pathianin ram min pek a ni tih a chianna em em chu a lo awmsate umchhuah emaw, nekchhuah emaw ngai lova, ram awl sa kan luah mai te chu a ni a ti a. State kan nih hnuah hmasawnna tam tak zofate'n kan hmu chho nasa hle a. Tlawmngaihna, sem sem dam dam, mahni intodelh tih te chu zofate hnamdangin min hriat dan a ni thin a. Tun dinhmunah chutiang ang chuan kan thenawm ram dangte'n min hmu em tih erawh keimahni kan inenfiah a tul thu a sawi bawk.

He hun hi Pu K. Lalthanzama, Vice President, Sub Hqrs. YMA chuan kaihhruaiin Pu Paul Rokima, DIPRO Mamit chuan kalkhawmte hnena lawmthu sawina a nei a. He hunah hian Mamit khawpui chhunga Sorkar Department hrang hranga thawktute, tlawmngai pawl leh khawtlang hruaitute an tel tha hle a ni.