No.445/2020-2021

Vawiin khan Mizoram Legislative Assembly Speaker Pu Lalrinliana Sailo, chuan a bial Chalfilh huamchhunga Sesawng khua a, nimin chawhnu a thli leh ruahpui avanga chhiattawkte a hmuna a tlawh.

VC House Sesawnga khawtlang hruaitute nena inkawmna tawite neih a, Pu Lalrinliana Sailo chuan a bial harsatna chu amah harsatna a ni tiin corona virus avanga inkharkhipna kalpui mek laia mipui harsatna ti belhchhahtu khuarel chhiatna Sesawng khua in tawk chu pawi a tih thu a sawi a. Corona hripui dona kawnga mahni intodelh a pawimawh thusawiin chhungkaw tinin buh leh bal tharchhuahna lama tan kan  lak thar a ngai a, inhmuhchhuah nan hmang ila tiin kan idol te chu loneitute leh kuthnathawktute hi an ni tur a ni, a ti.  

Speaker chuan Aizawl DC Addl DC  Pi Vanlalruati leh BDO Thingsultliah Pi Lalzikpuii te  chu Sawrkar atanga khuarel chhiattawk chungkua te tana chawmdawlna leh tanpuina pek thin te chu a chin awm mahse a thei anga huamzau zawnga pek dan ngaihtuah sak turin a ngen a. Sesawng VCP Pu Ralthansanga chuan chhena in chhia chungchang sawiin heng in te sak thatna tur bungrua lakkhawm lamah harsatna an nei thu sawiin khawtlang in bungraw senghawi leh in thuamthat hna te hi nilenga khawtlangin vawiin an thawh tur thu a sawi bawk. Bialtu in chhiat tawk te tanpuina a

Nimin chawhnu a thli leh ruahpui in Sesawng a nuai ah hian mimal chenna ni 19, PHE Quarter 1 leh ICI Kohhran Hall chu chenzui/hmatlak tlak tawh lovin a len chhe vek a. In dang 63( mimal chenna in 58 leh pawl/kohhran hall 5) te chu a inchung rangva leh a bang a tile te a tichhe nual a. Thli tleh avanga inhliam mipa pakhat a awm a, a dinhmun hi a ngaihtuahawm lo a ni. Speaker chuan heng in te hi tlawhin chhuakin chhena in chhe vek chhungkaw te chu pawisa fai cheng 5000 theuh leh buhfai bag 1 theuh in a tanpui a. Inchhung rangva len chhe zual in engemaw zat chu cheng 3000 in a tanpui bawk a. VCP hnenah heng in thuamthat ngaite mamawh lei nan cheng nuai 1 a hlan bawk a ni.

Vawiin vek khan Speaker in inkharkhipna avanga Sesawng a chhuancham leh mi harsa tanpui nan buhfai bag 50 a pe a, hetiang bawkin Khawruhlian atan bag 30 leh Khawlek atan bag 20 a pe bawk a. Sesawng a tui harsa tihziahawm nan amah mimal motor chu mipui te tui mamawh phur  turin Sesawng ah Speaker hian a dah bawk a ni.

Thenawm khua Khawruhlian leh Thingsultliah VCP ten Sesawng VCP chu hnatlang te thingpui in na tur cheng 5000 theuh an hlan a. Aizawl Addl DC Pi Vanlalruati pawhin hnatlang thinpui inna tur cheng 5000  a hlan bawk a ni.

Nimina thli tleh in Sesawng tlang dungah electric hrui hmun tam taka a tichat a, ban awn leh tlu a awm nual  bawk a. Hengte zawmthat leh siamthat hna hi vawiin khan P&E Department chuan an thawk tan nghal a ni.