3049/2022-2023
Aizawl, the 14th December 2022: Vawiin khan Shyama Prasad Mukherji Rurban Mission (SPRM) leh MGNREGS convergence atanga cheng nuai 36 senga sak Sesawng VC-III Community Hall hawnna hun neih a ni a, Assembly Speaker Pu Lalrinliana Sailo chuan khuallian niin hall hi a hawng a. Rural Development Minister Pu Lalruatkima chuan khualzahawm niin a hmanpui bawk.

He hunah hian thusawiin Pu Lalrinliana Sailo chuan hall tha tak sak nana hmalakpuitu Rural Development Minister Pu Lalruatkima chungah lawmthu a sawi a, khawtlang mipuite duhna leh mamawhna hre chungin hmasawnna kawng zawh zel a nih tur thu a sawi bawk. Hmasawnna karah thil tha lovin mi a nuai thin thu Assembly Speaker chuan sawiin aia upa zahna, kohhran zahawmna leh hlutnate mai bakah tlawmngai pawlte thahnemngaihna leh inpumkhatna atana hmalaknate tithuanawp zawnga chetna laka inthiarfihlim turin kalkhawmte chu a chah a ni. Harsatna hrang hrang ten sorkar tibuai mahse mipuite khaichhuahna atan SEDP chu changtlung zawka kalpui zel a nih tur thu sawiin, Daido atanga Mizoram leh Manipur inrinna thlenga inkalpawhna kawngpui tha zawk siam nan cheng vaibelchhe 33 pawm a nih thu a sawi bawk.

He hunah hian khualzahawm Rural Development changtu Minister Pu Lalruatkima chuan hall tha tak din theih a ni chu lawmawm a tih thu sawiin, khawvel hmasawnna chuan rual awhna tha a hringchhuak a ni, a ti a. Mahni hlawkna chauh um lova tha leh tlo zawka hnathawh kawnga inelna thianghlim awm mek chu lawmawm a tih thu a sawi bawk. Khawpuia hmasawnna ruhrel awm ang thingtlang miten an neih ve theihna turin ‘Shyama Prasad Mukherji Rurban Mission’ chu Mizorama RD Block pahnih - Aibawk leh Thingsulthliahah te kalpui a nih thu a sawi a. India rama he mission kalpuina cluster-300 zingah Mizoram chu thawk tha ber dawttu an nih thu leh hemi lawmman ah hian SPRM chu Khawzawl leh East Lungdar RD Block-ah te kalpui turin Central sawrkarin an pek thu a sawi a ni. Hall chu dimdawi leh neitu rilru pu chunga enkawl turin khawtlang mipuite chu a chah a, faina lama hmasawn zel turin a ngen bawk a. Ram tikang lo tur leh humhalh kawngah tan la zel turin kalkhawmte chu fuihin, ram siamthatna kawnga sawrkar thawhpui zel turin a sawm bawk.

Sesawng VC -III Community hall hi Shyama Prasad Mukherji Rurban Mission leh MGNREGS convergence atanga pawisa hmuh hmangin cheng nuai 36 senga sak a ni a. A dung feet 60 a sei niin, a vang feet 30 a zau a ni a, a san zawng feet 22 a ni.

He hunah hian Assembly Speaker leh Minister hi Rural Development Department leh Thingsulthliah RD Block-a officer leh staff ten an tawiawm a ni.