No.7396/2020-2021 

Vawiin khan Mizoram Legislative Assembly Speaker Pu Lalrinliana Sailo chuan  Bangladesh ram nena kan insumdawn tawnna atana ruahman Integrated Check Post (ICP), Kawrpuichhuah leh Trade Facilitation Centre, Tlabung a tlawh.

Speaker hi Lunglei HPC Vice Chairman Pu Lawmawma Tochhawng, official - te leh party hruaituten tawiawmin Tlabung ah West Tuipui Assembly Constituency bialtu MLA Pu Nihar Kanti Chakma leh SDO (C) Pu Lalsanglura hovin Tlabung Sub Division official-te leh khawtlang hruaituten an lo dawngsawng a ni.

Speaker leh amah zuitute hian ICP Trade Centre hmun Kawrpuichhuah Tlabunga ruahmanna kal mek ngun taka enfiahin helaia official-te leh khawtlang hruaitute nen hmachhawpte an thlirho a.Bangladesh nena insumdawn tawn nana thil pawimawh zinga pakhat Trade Facilitation Centre, Tlabung 9th December 2011 a hawn chu an tlawh bawk.

Integrated Check Post dinna hmun tur Kawrpuichhuah Tlabunga inkhawm tawi neihah Speaker Pu Lalrinliana Sailo chuan  kan ram economy than len zelna turin ram dang nena insumdawn tawnna tih hmasawn a pawimawh takzet a ni tiin hemi kawnga kan state hmasawnna turin amah ngei pawhin theihtawp alo chhuah thin tawh thu leh sawrkar laipui hotute leh ram thenawm hruaitute vawi engemawzat alo dawr thin tawh thu a sawi a. Kawrpuichhuah leh a chhehvel chu international trade hmunpui pawimawh tak ala ni chho zel dawn a, hei hian kawng hrang hrangin hmasawnna ala thlen zel dawn a ni tiin he sumdawnna hmunpui ti hlawhtling tur hian Tlabung leh a chhehvel mipuite hmalak puiah a sawm a ni.

Vawiin vek khan Speaker chuan DIG, BSF Hqrs Aizawl Pu Kuldeep Singh leh 60Bn BSF Commandant Pu Vinay Yadav inkawmna hun tawi a hmanpui a. Speaker chuan  ramri-a chengte tih hmasawn leh dawmkan chu thil pawimawh tak a ni tih sawiin sipaite leh mipuite inkarah thawhhona leh inpumkhatna tha zawk a awm a pawimawh tih sawiin, inhriatthiam tawnna nena boruak tha tak hnuaia khawsak tlan a tul tih a sawi a.  BSF hmun Kawrpuichhuah pawh tlawh nghalin sipaite leh mipuite inkara inpumkhatna tha tak awm theih dan tur a sawipui a. Hemi chungchang bawhzui chhunzawm turin thla leh February ni 3 ah hian BSF DIG leh Mizoram Chief Secretary meeting tura koh a tum thu Speaker hian a sawi a ni. Mizoram huamchhunga India - Bangladesh border hi 318 kms a thui niin Lunglei District ah ramri hi 112 kms a thui niin BSF Border Outpost (BOP) 26 a awm a ni.

ICP Kawrpuichhuah dinna tur hian kum 2005 khan M/s Rites Ltd. ten Home Ministry hnenah an survey report thehlutin he ICP dinna tur hian ram 224.99 bigha a zau acquire a ni a. India leh bangaldesh inkalpawhna ti awlsam tur hian Kawrpui lui (Theka) ah RCC Double Lane Bridge siam tum a ni bawk a. He RCC Bridge siamna tur hian Mizoram PWD chuan Sawrkar Laipui Ministry of External Affairs ah Rs. 230.01 crores hu DPR chu January 17, 2020 khan anlo thehlut tawh a ni. He RCC Double Lane Bridge hmang hian awlsam zawkin Indo-Bangaldesh insumdawn tawnna kalpui theih a ni dawn a, sawrkar laipuiah bawhzui mek a ni. Tlabung leh Kawrpuichhuah inkar kawng 18km chu laih zawh ani tawh bawk a ni.

ICP Kawrpuichhuah hi a puitlin hunah chuan Bangladesh ram nena insumdawn tawnna hmun pawimawh a ni chho dawn a,mumal taka bungrua thawnchhuah leh lakluh (Export & Import) chhinchhiah a ni dawn a, chutih rual chuan ram dang atanga Dan lo anga mihring lut turte pawh uluk takin ICP ah hian endik a ni dawn a ni. He ICP puitlinna tura pawimawh tak Lunglei leh Tlabung inkar ah kawngpui (Double Lane) 100kms chu survey zawh tawh niin kawngpui tha takin Tlabung hi a pawh dawn a ni.