Assembly Speaker Pu R. Romawia chuan Inrinni kalta khan Tuirial Hydel Project power 60 MW pe chhuak thei tur NEEPCO in an thawh mek chu a hmun ah kalin a en a. NEEPCO Project Director Pu N.K. Mao chuan lo dawngsawngin hna thawh mekna hmun te a fang kual pui a. An hnathawhna tichak tura ngenna hrang hrang te Speaker hnenah hian a thlen nghal a ni. Pu R. Romawia hian NEEPCO hnathawh mek hi ziaka an tarte thlir hmasa in hemi hnu hian a hmun hma fangkualin Power House tur ruahman mek te channel verh lai 1 km a sei pahnih inzawm tur a verh mek te, tuikhuahna tur hmun te spill way te, a fangkual a. NEEPCO hotute chuan heng an hnathawhna kawnga an mu tan leh tun aia chaka an thawh theih nan a hma lak pui turin Speaker hi an lo sawm a ni.

NEEPCO Project Director chuan Mizoram sorkar in he project hi a phur pui hle avanga an lawmzia Speaker hi an lo hrilh a. Chutih rualin lungchang rora hi hla tak atanga lak ngai chu an hnathawhna hmun atanga 16km vel lek a hla Mauchar ah quarry lung tha tak a awm bawk si avangin he hmun atanga lung an lak na phal sak turin Pu Romawia chu a lo ngen a. Hei hi min phal sak theih chuan 100km chuang atanga lak ai chuan a sam khai hle dawn a ni a ti a. Heti sorkar in min ngaih pawimawh sak hram se, a tul angin kawng tha pawh min sial sak se tiin a lo thlen a ni.

Pu R.Romawia chuan Mizoram tana ro la chang tur Tuiral Hydel Project chu hna phurawm tak a ni, tiin an thil ngen te chu tih awm tak nia a hriat thu a sawi a. Hna chak theih nan ka tih theih ang apiang ka ti dawn a, kan Chief Minister pawh ka sawipui ang a ni a ni.

NEEPCO hotupa chuan sorkar atanga phurpuina an mamawh hle tih sawiin sorkar official te pawn la tlawh uar deuh deuh se a duh thu a sawi a ni. Speaker hi Pu Vanlalnghenga Addl. Secretary Mizoram Legislative Assembly bakah Vairengte SDO Pu K. Lalrohlua leh Power Department hotuten an tawiawm a ni.