Indian Chamber of Commerce, Kolkata leh Ministry of Food Processing Industries (MoFPI) chuan Mizoram sorkar puihna in thei leh thlai sawngbawlna kawnga Mizoramin hma a sawn theih nan State chhung leh pawna sumdawngmi te intawhkhawmna, State Guest House, Bawngkawnah vawiin nileng khan an buatsaih a. Agriculture leh Horticulture Minister Pu H. Liansailova chu khualllian niin Industries Minister Pu S. Hiato chu khualzahawm a ni.

Khuallian chuan Mizoramah transportation, communication leh electricity duhthusam a la awm loh avangin sorkarin, Industry lama a hmathlir te a la tipuitling hleitheilo a ni, a ti. Thlai, thei leh thildang tharchhuah kawngah harsatna a awmloh laiin tharchhuah hralhna kawngah mipui ten harsatna lian tak an tawk a, chuvangin thlai tharchhuah rampawna thawnchhuah tlak khawpa sawngbawl (process) hi kan mamawh hle a ni, a ti a. Sumdawngmi State chhung leh pawn atanga kal khawm te chu Food Processing Industries lama sum an peipung duh a nih chuan hmabak duhawm takin a hmuak a ni tih hrilhin sorkar pawh a inhawng hle a ni, a ti. Pu H. Liansailova chuan State sorkarin loneitute rahbi tukna tur remchang NLUP hmanga a siamsak leh Central sorkar Policy tha tak tak kalpui mek te hian tharchhuah kawngah nasa takin loneitu te a pui dawn a, chuvangin heng tharchhuah sawngbawlna tur Food Processing Industries lama ngaihtuahna thar seng turin kalkhawm te a sawm a ni.

Khualzahawm Pu S. Hiato pawhin thlai leh thei sawngbawl kawngah State sorkar hnuaia Corporation thenkhat kaltlanga sorkarin hma a lo lak thin tawh thu leh tun dinhmunah duhthusama hma an sawn theih rihloh thu a tarlang a. Engkim that duhna hmun Mizoramah thlai leh thei sawngbawlna hawizawng sumdawnna chuan hmabak a neihthatzia kawhhmuhin serthlum, sapthei, sawhthing, hmarchate leh aieng hnianghnar taka Mizoramin a tharchhuah te chu thawnchhuah tlak khawpa sawngbawl a nih chuan a hlawk hle dawn a ni, a ti. North East a Investment ti duh tan Central Sorkarin Subsidy hrang hrang Transport, Central Capital Investment, Interest leh Insurance Scheme a siam te leh State sorkar pawhin Subsidy hrang hrang a siam te chu hmang tangkaia an sum te Food Processing Industry lamah peipung turin a sawm a. Transport lamah pawh hmabak eng tak Mizoramin a neih thu tarlangin Multi Modal Transport Project hmanga Myanmar leh Assam lawng hmanga kalpawh a nih tur thu leh Sairang thlenga rail kawng siam tum a nih thu te a tarlang nghal bawk.

Mizoram Food Pro: Investors Meet hawnna inkhawmah hian Chief Secretary Pu Vanhela Pachuau pawhin tel puiin thusawina hun a hmang a, Indian Chamber of Commerce Advisor - North East Initiative Pu Nakib Ahmed chuan inkhawm hi a kaihruai. Agriculture Secretary Pu TV Fambawl leh mithiam dang ten zirtirna pe in sawihona hun hmanzui nghal a ni.

He meet in a tum ber chu Ei leh in sawngbawlna kawnga Mizoram thei leh thlai tangkai taka hman anih theih nan Investor leh a kaihhnawih peng hrang hrangte chochhuah te, Central leh State Suma hamthatna Scheme hrang hrangte inhrilh hriat lah hman tangkai dan kawng kawhhmuh te, Technology leh Services hrang hrang hmarchhak bial atana hmalakna inhrilh hriat a, loneitu/huanneitu (Kuthnathawktu) te hamthatnan a contract farming, sourcing, processing, value addition, distribution and marketing atana remchanna siam sak bakah Agriculture leh Horticulture atanga thar chhuah tangkai leh hlawk zawka sawngbawl theih awmte zirchianna thlan chhuah te a ni.