Mizorama ruihhlo hluar zel leh ruihhlo ngai pung chak tak zirchiang leh do tura hmalakna hrang hrangte enfiah turin Mizoram Legislative Assembly hnuaia peng pakhat Assembly Subject Committee- I memberte chuan nimin tlai khan Champhai an lo thleng a.

Vawiin chawhma khan Champhai Sub-Headquarter YMA, Vanhnuailiana Group YMA leh Tuipui Ral Group YMA-te nen  inkawmhona leh inrawnkhawmna hun an nei a. Assembly Subject Committee I hian an thil hriat duh ang angte lakhawmin hma an la zel dawn a. Mizorama ruihhlo lo lut a tlem theihna atana sawrkar hmalakna tura an duhte report siamin Assembly Session-ah report kimchang an thehlut dawn a ni.

Tukin zing khan Assembly Subject Committee I member-te hian Champhai Winery, Champhai Tlangsam leh Excise and Narcotics Department Office, Champhai te chu an lo tlawh tawh bawk a ni.

Assembly Subject Committee-I hminga zinte hi Acting Chairman  Lt Col ZS Zuala (Retd), MLA bakah member dang pathum Pu Nihar Kanti Chakma, MLA, Pu Vanlalzawma, MLA leh Pu Lalruatkima, MLA-te  an ni.