Vawiin khan BNRGSK Aibawkah M.U.P Sateek Area Conference vawi 33-na hman a ni a. He hunah hian Minister of State for Co-operation, Fisheries etc Pi Vanlalawmpuii Chawngthu chu Khuallian niin, M.U.P Sateek Area chhung Maubuang, Phulpui, Sateek, Aibawk leh Tachhip atangin M.U.P member thahnem tak an tel a ni.

Khuallian Pi. Vanlalawmpuii Chawngthu chuan thu sawiin khawvela hnam changkang apiangin aia upate an zahthiam a, upate chu hnam rohlu an ni, a ti. Thalaite khawvel hi upate tello chuan a famkim theilo a, tawn hriat anlo ngah tawh naah upate rawn leh zahthiam apiang chu mi fing an ni, a ti a. Mizote hian aia ute zah leh enkawlna kawngah hnam dang kan tluklo hle a, an rilru leh taksa hriselna chu anmahni  enkawl tute ah a in nghah nasat avangin  tan kan lak a ngai a ni, a ti a. Upate chu mahni in duat thiam turin a chah a, an thluak te chu chawlh tir mai lovin rilru sawizawi nan pawl  hrang hrangah in hmang zel turin a fuih a. M.U.P Sateek Area Conference lawmna tur ruai memberten intuak chawpa an buatsaih thei chu entawntlak a tih thu a sawi bawk a ni.

Conference hi MUP Sateek Area President Pu Vanchhunga’n a kaihruaia, kum 2017-18 chhunga Sateek Area MUP member boral 15 te sunna hun hman niin ,  Unit tin  atangin  report ngaihthlak a ni bawk. Conference hmangtu kum upa zual hnenah thilpek hlan a ni a, Lengkhawm zai intihsiakna neih niin Area Vice President Pu H Siamliana’n lawmthu sawina in hun a ti tawp. He hunah hian MUP member 150 vel telin Conference pual hian tlai dar 3 atangin ruai buatsaih a ni.