Nimin (24.11.2016) khan Mizoram Legislative Assembly-a Subject Committee-I te chuan _ Serlui ‘B’ Reservoir-a sangha khawi dan chi khat Caged-Fish Culture an tih chu an tlawh.

He hunah hian Subject Committee-I chairman Pu P C Zoram Sangliana leh Committee member Pu John Siamkunga, Pu Vanlalzawma, PuT Sangkunga leh Pu Lalruatkima te bakah Assembly Secretariat leh Fisheries Department lam atangin official ten an tawiawm bawk a ni.

Serlui’ B’ Reservoir-ah hian Fisheries Department chuan RKVY programme hnuaiah Cage 96 a siam mek a, Cage pakhat zelah hian kumtin sangha chi 3500 chhuah thin a ni. He sangha khawina hi PPP mode-in, Department leh khaw thlan bik ten 50:50 a inremsiama kalpui a ni a, Department lamin sangha chi leh chaw te an tum laiin a chaw pek, tihfai leh venhimna lam hna erawh khaw mi ten an thawk thung a ni. Tunah hian Fisheries Department, North Chawnpui leh Bilkhawtlir khua ten Cage 48 an enkawl mek a, a dang 48 chu Department leh New Builum khua ten an enkawl thung a ni. Cage Culture 96 atang hian kum 2014-15 leh 2015-16 chhung khan sangha eitling Quintal 501 thar chhuah niin market rate aia tlawmin sangha hi kg-ah Rs. 100-a hralh thin a ni. He Serlui ‘B’ Reservoir-a Cage Culture hi CIFRI, Barrackpore norms anga Mizoramah bultan niin Committee chairman Pu PC Zoram Sangliana leh member te chuan Fisheries Department ten mipui te tan malsawmna ni tura an hnathawh chu a ropuiin lawmawm an tih thu an sawi a, Serlui dung tluan leh hmun dangah pawh kalpui theih ni se thaa an hriat bakah Department Official te chu Fish Farmer te tan theihtawp chhuaha malsawmna ni zui zel turin Chairman chuan a chah bawk.

Subject Committee-I hian Tuiriala Hydro Power Project, NEEPCO hnathawh mek leh hmunhma te pawh tlawh nghalin harsatna hrang hrang an tawh chungchang te pawh an sawipui nghal bawk a. Kum 2017 June thlaa Commission fel a nih hnuah Caged-Fish Culture kalpui ve theih ni se thaa an hriat thu an sawi bawk.