Vawiin khan Lawngtlaia office hrang hrang hotu lute chu November ni 29-a Mizoram Chief Minister Pu Lal Thanhawla'n Lawngtlai a rawn tlawh huna lo dawnsawn dan tur relin Bawrhsap Dr A. Muthamma IAS hovin a office chamber-ah an thu khawm.

He hunah hian Chief Minister programme duan sa thlir ho niin, chumi zulzui chuan ruahmanna siam a ni a. Mawhphurhna hrang hrang insem niin, he hunah hian Lawngtlaia sawrkar department hotu lute chu kim vek ni se, tih a ni.

Ruahman lawk dan chuan November ni 29 zanah Chief Minister hian Siaha atangin Lawngtlai a lo thleng ang a. November ni 30 zingkarah Mampui AH & Vety Farm Complex-a ar, vawk leh bawng vulhna hmun a hawng dawn a ni.