Vawiin khan Nehru Yuva Kendra, Lawngtlai leh MHIP Sub-Headquarters, Lawngtlai tang kawp chuan Lawngtlaia JH Lorrain Hall-ah khawtlang hmasawn nana thalaite intawh khawmna (neighbourhood youth parliament) an buatsaih a. MDC Pu T.Lalengmuana chu Khuallian a ni.

Khuallian chuan sawrkarin thalaite a ngai pawimawh em em a, an tan hamthatna hrang hrang a duang a ni tiin, khawtlang hmasawn nana thalaite mawhphurhna pawh a sang hle a ni, a ti a. Khawtlang sualna do tura mipui tan rual a tul thu sawiin, mi dang nen tha taka nung ho turin nunphung tha neih a tul a ni, a ti. Lawngtlai district hmasawn nan hriselna, ziak leh chhiar thiamna leh zirna kawngah theihtawp chhuaha hma lak a tul thu a sawi bawk.

He hun hi MHIP Lawngtlai Sub-Headquarters Assistant Secretary Pi A.Lalmalsawmi'n a kaihruai a. BCM pastor Rev. F.Lalnunmuana'n hunserh hmangin, NYK Lawngtlai District Co-ordinator Pi Mercy Sellate chuan youth parliament buatsaih a nih chhan leh a tum tlangpui a sawi fiah a. Lawngtlai DIPRO Pu C.Lalhruaitluanga'n "khawtlang hmasawn nana hmeichhia leh thalaite mawhphurhna" tih a sawi a. Zaithiamte zai ngaihthlak niin, sawi hona hun tha tak hman a ni bawk.