Vawiin chawhma dar 10:30 khan Chanmari YMA Hall-ah Aizawl khawpui chhunga faina kawnga School leh Zirtirtu thawk tha te hnenah School Education Department leh UD&PA Department tangkawp chuan buatsaihin lawmman hlanna hun neih a ni. School Education Department Parliamentary Secretary Pu Joseph Lalhimpuia chuan he hun hi a hmanpui a ni.

Parliamentary Secretary chuan “Faina hi hmasawnna man tlawm ber, Qualification engmah ngai bawk silo mahse hlawkna tam tak thlen tu a ni,” a ti a. Kan khawsakna hmun te hi fai tak leh mawi taka kan enkawl chuan midangten hmuh an chak thin a ni. Sorkar laipuiin faina leh thianghlimna ngaipawimawh a Swachh Bharat Programme a kalpui chu thil lawmawm tak a nih thu sawiin, sorkar hmalakna pakhat anih vanga zawm satliah ve mai lova, thianghlim tak tak duhna rilru kan neih theuh theih nana hmalakna anih thu leh chumi tur chuan faina hi mitin mawhphurhna a ni tih kan hriat reng a tul a ni, a ti a. Faina hi inzirchawp zel theih thil a nih thu sawiin, lirthei neitute chuan an lirthei chhungah bawlhlawh paihna tur bawmte dah thei thin se, chu chuan thui takin khawpui fai a thlen thei dawn a ni,a ti. Pu Joseph Lalhimpuia chuan zirtirtute chu naupang te an rilru chhung ril ber pawh a kaihhruai theitu an nih avangin school naupang te chu eng ang mizia in nge an enkawl chhuah tih an hriat a pawimawh thu a sawi bawk.

He hun kaihruaitu Pu K.Lalthawmmawia IAS, School Education Director chuan North East Social Impact Award, 2015 chu Mizoram in a lo dawn tawh thu tarlangin, School tin te bawhzui turin Swatch Bharat Mission leh Clean Mizoram Programme kum tluana kalpui dan tur kaihhruaina chhuah a nih thu a sawi a. Aizawl hi pawna inthiar awm lohna (open defecation free) khawpuia puan theih a ni tawh a hriat a nih thu leh, chumi atan chuan School tin in mawhphurhna an neih theuh thu a sawi bawk.

Vawiin hunah hian Pu R.L.Zidinga, Dy.Director UD & PA hnen atangin Swachh Bharat Programme Mizoram a kalpui dan leh hmalakna ngaihthlak a ni a, Pi Lallianzuali Bawitlung, SDEO West hnen atangin report ngaihthlak a ni bawk. Pu S.T.Zaduna, Joint Director, School Education chuan lawmthu sawi in hun a khar a ni.

Faina kawnga thawk tha School leh Zirtirtu tha tlan te hi School Education Department-in a buaipui a, UD & PA ten a senso leh tul dangte an tum a ni.

Hetiang hian lawmman sem a ni:

A. School category :

Pakhatna : Govt.Zotlang M/S, Aizawl

Pahnihna : Govt.RKM M/S, Zemabawk ‘N’ Aizawl

Pathumna : Govt.Salem M/S, Aizawl

B. Teacher category :

Pakhatna : Pu C.Lalrinthanga, Teacher, Govt.Zotlang M/S, Aizawl

Pahnihna : Pu Lalnunhlima, Republic High School Aizawl

Pathumna : Pi J.Hmingduhawmi, Headmaster, Tanhril P/S-I