Vawiin khan I &PR Conference Hall ah ATI Director Pi Lalzarmawii leh DP&AR Under Secretary Pu Lalrohlua te chuan chanchinbu mite, Press Meet ah kawmin The Mizoram Right to Public Services Act, 2015 chungchang sawizauna leh hrilhfiahna hun an hmang a, he dan hi mipui in an la hmelhriat tawk loh avangin a puanzarna leh mipui zirtir kawnga chanchinbu mite chu theihtawp chhuahpui turin an sawm a ni.

Press Meet ah hian Pi Lalzarmawii, Director, ATI chuan he Dan chungchang sawi zau in a huam chin te, service sengluh te, service diltu mipui mawhphurhna te, service petu mawhphurhna te, lungawilohna a awm a, thu leh hla thlen dan te leh he dan hnuaia hremna pek theih dan te chu chipchhiar takin a tarlang a. Pu Lalrohlua, DP&AR Under Secretary chuan he dan chungchanga hriatbelhna leh zawhna awmte a chhang a ni.

Mizoram Sawrkarin mipuite hnena “service” chi hrang hrang a pek chhuah thinte hunbi tiam chhung ngeia a pek chhuah thinna tur dan “The Mizoram Right to Public Services Act, 2015” chu ni 01.12.2015 khan hman tan a ni a. He dan hian India khua leh tui te chu Sawrkar in service a pek chhuah thin te dilna an thehluh atanga hunbi tiam chhunga an dawn ngei ngei na turin dikna chanvo (right) a rawn pe a ni. He Dan hian Mizoram pum pui a huam a, mahse Sixth Schedule hnuaia Autonomous District Council te’n he dan hi an adopt anih loh chuan a huam chuang lo.

He dan Section 4-na tlawhchhanin Mizoram Sawrkar hnuaia Department hrang hrang paruk heng – Transport Department, Taxation Department, Rural Development Department, Finance Department, Social Welfare Department leh Public Health Engineering Department te’n mipuite hnena “service” an pek chhuah thin sawmli leh paruk (46) te chu India khua leh tui (citizen) in “service” pe chhuaktu Designated Officer hnena ziaka dilna a thehluh atanga hunbi tiam chhung ngeia an dawn theihna turin Sawrkar in Notification a lo chhuah tawh a. Section 4(1) in State sawrkar a thuneihna a pek angin he dan hnuaiah hian mipui mamawh “service” hrang hrang te a tul dan ang zelin dah/sengluh theih a ni bawk.

He dan hnuaia “service”  dah tawh chu a diltu hnena pek chhuah hun tur “hunbi tiam” (stipulated time limit) siam zel a ni a. He dan hnuaia “service” dah tawh chu a pe chhuaktu tur “Designated Officer” State sawrkar in a ruat zel bawk a ni. Khua leh tui te’n he dan hnuaia “service” te dilna an thehluhin fel fai taka dilna form awm apiang te ziah leh document thehluh ngai apiang thehluh tur a ni a, Sawrkar hnathawk “service” pe chhuaktu “Designated Officer” a ruat chuan he dan hnuaia “service” dah tawh te chu a diltu hnenah hunbi tiam chhungin a pe ngei tur ani.

He dan hnuaia lungawilohna thlenna tur pakhatna “First Appellate Authority” leh lungawilohna thlenna tur pahnihna “Second Appellate Authority” te State sawrkar in Section 4(3) hmangin a ruat vek a. Lungawilohna thlen tum khatna hi “service” dilna siamtu khan a thehlut thei a, “service” dilna an hnawl emaw atanga ni 30 chhunga siam tur a ni a, engemaw harsatna bik avanga dilna thlentu in hun tiam chhunga  lungawilohna a thlen theih loh in ni 60 thleng hun hi pawhsei theih ani.

First Appellate Authority chuan Designated Officer in chhan leh vang mumal tak awm lova miin “service” a dil chu  hunbi tiam chhunga pe lovin a lo tikhawtlai nia a hriat chuan hunbi tiam ral hnu atanga a pek chhuah hma zawng nitin Rs. 250 a chawitir thei a, Rs. 5000 thleng chawitir theih ani. Second Appellate Authority chuan First Appellate Authority in chhan leh vang mumal awm lovin lungawilohna a hnena thlen chu hun tiam chhunga a rem lohvin Rs. 500 atanga Rs. 5000 thleng a chawi tir thei bawk

He dan hi Mizoram ah kum 3 chuang hman tawh a ni a, chutih rualin a hmangtu tur mipui te’n he dan hi an la hmelhriat tawk lo niin Sawrkar chuan a hria a. Kum 2018 August thla atang khan District/Sub Division leh RD Block hrang hrang te tuamin he dan hi mipuite hnena zirtirna kalpui mek a ni a, sawrkar chuan Aizawl pawn lam District headquarters hrang hrangah college zirlaite nen emaw Seminar buatsaih a tum bawk a. Tunlai IT lama hmasawnna hmang tangkai angin he dan hnuaia “service” hrang hrang te online a dilna thehluh leh online a pek chhuah pawh Sawrkar chuan a tum a, ICT Department in application software a siam mek a. He dan hnuaiah hian “service” dang pawh la sengluh belh zel tum ani bawk.

The Mizoram Right to Public Services Act, 2015 chungchanga hriattur pawimawhte chu DP&AR website dpar.mizoram.gov.in ah engtik lai pawhin hmuh theih reng a ni.