Vawiin hian Serchhip I&PR Conference Hall ah kan hma lawk March ni 1, 2019 a Chapchar Kut lo thleng tur hman dan tur ngaihtuahin Chapchar Kut Organising Committee te chu Addl. DC Pu Chuauhnuna hovin an thukhawm.

He committee, Pu Chuauhnuna, Addl DC kaihhruai hian Chapchar Kut hi Leisekawt Field-a hman a rel a, a hun atan chawhma dar 11:00 a ruat a ni. Kut thlengtu hi Pu VL Remliana, Project Director ani anga, Kut Nu atan Pi Sangchhin Chinzah, Bawrhsap chu ruat ani. A hmunhma buatsaih chungchangah mawhphurhna hrang hrangte siam a ni a, MUP leh MHIP ten Mizo hnamze tilang thei thil phochhuahna nei leh se tia rel niin Serchhip Photographer Association chu Chapchar Kut Miss, 2019 thlang tura ruat an ni bawk. A hman dan tur Programme kimchang zawk hi Sub- Headquarters YMA te duan tura dah a ni.

Chairman Pu Chuauhnuna chuan Chapchar Kut chu Zofate tana kut pawimawh ber a nih avangin a theih ang tawka ropuia lawm theih tha a tih thu a sawi a. Kumin atan hian sawrkar in Rs. 3 lacs a pek tur thusawiin, mawhphurhna hrang hrang changtuten theihtawp chhuaha kan hma theuh hlen tumin, kut hlimawm tak hman i tum ang u, tiin mawhphurhna changtute a fuih a. Serchhip mipuite pawh Kut tura lo inbuatsaih lawk turin a ngen a ni.