Kumtin August ni 20-hi rampum huapa hnam inpumkhatna leh inunauna Ni ‘Sadbhavana Diwas’ a hman thin chu kumin hian hman a ni leh dawn a. He Ni hi ramchhunga hnam hrang hrang leh tawng hrang hrang hmang, India khua leh tuite inkarah induhsakna leh inhriatthiam tawnna boruak duhawm tak a awm zel theih na tura inzirtirna atan a hman thin a ni.

Rampumah sorkar pisa tinah chawhma dar 11:00-ah ‘Sabhavana Day Pledge’ chhamrual tur tih a nih angin Mizoram sorkar hnuaia pisa hrang hrangahte pawh he hun hi hman a ni dawn a. Mizoram Civil Secretariat hnuaia thawktu zawng zawngte chu New Secretariat Complex, Khatla kawtah Chief Secreary kaihhruaiin he hun hi an hmang ang a. Civil Secretariat Annexe-a staff te chu Pu Rodney Ralte, Secretary, Horticulture & District Council & Minority Affairs-in a kaihruai thung dawn a ni. Sorkar department leh office dangah chuan an hotulu berten he ‘Pledge’ chhamrualna an kaihruai bawk ang.