Nimin tlai khan Circuit House, Lunglei ah Pu John Rotluangliana, FCS&CA Minister in a Department chan FCS&CA leh Tourism Department a thawktute kawmna hun a hmang.

Pu John Rotluangliana chuan kum nga dawn Supply Department  a enkawl chhung hian hmasawnna tam tak a thleng a, Department in harsatna leh mualphona em em awm lovin a kal theih nachhan chu a thawktuten thawhhona tha tak an neih vang a ni tiin Department hnathawktute thawhrimna  leh inpekna avangin an chungah lawmthu sawi a. Department hnuaia hmalakna hrang hrang te sawilangin Food Security Act 2013 hman a nih tawh thu te, furpui laia kal harsatna Supply Centres thlanchhuah 47 ah October 2018 thleng tla tur buhfai chhek khawl a nih tawh thu te a sawi a. Mipuite ei leh bar ah harsa lo a kan pek theih avangin a lawmawm hle a, LPG leh POL ah pawh harsatna lian tham awm lovin kalpui thin a ni, a ti.

Tourism Department ah pawh nasa tak a hmalak niin Mizoram Tourism ti hmasawn tura sawrkar hmalakna hrang hrang - 18 holes Golf Course Thenzawl, Adventure Park Reiek, Ropeway Durtlang leh Chaltlang inkalpawh theihnate leh Skywalk, Sakawrhmuituai Tlang te a sawilang a.  Tourist facilities awmsa te thuam that mek an nih bakah Zokhaw lamah Rural Tourism tih lar nan State Sorkar hmalakna NEDP hnuaiah Rural Homestay kalpui mek niin Champhai District a khaw 6 (paruk) leh Mamit District a khaw 4 (pali) ah te he project hi chak taka kalpui mek a nih thu a sawi bawk.

Pu Vanlaltanpuia, DCSO, Lunglei chuan monsoon stock hi centre 7 ah dah a nih thu sawi in, november 2018 thleng daih tura tih a ni. Centre 8 ah buhfai August 2018 thleng pek tlak tawh a ni a. Lunglei District ah LPG distributor 9 an awm a, tun dinhmun ah LPG hi hnianghnar lutuk lemlo mahsela, a lo thleng ang ang hian harsatna awm lutuk lova sem mek zel a nih thu a sawi. Adhaar Seeding 70% pel in ration card ah 80% a pel tawh bawk. Pu Vanlaltanpuia chuan DCSO Office sak that te, godown chei that bak ah thawktute indaihlohna te Minister hnen ah a thlen nghal a ni.

Attachment

• Loading attachment...