India ramin British awpna lak ata zalenna a hmuh ni - Independence Day vawi 72-na chu ram chhung hmun dangte rualin, vawiin khan Tlabungah pawh ropui taka lawm a ni a, Hachhek bialtu MLA, Political Adviser to Mizoram Chief Minister ni bawk Pu Lalrinmawia Ralte-in a hmanpui. 

Thangliana-mualah tukin dar 9:30 khan India hnam puanzàr a pawhpharh hnu-ah, khuallianin parade contingent 10-te chibai buk chhang let a; India ramin mahni-a ro a inrel theihna tura ram tana zalenna sualtute inpekna hlutzia hre thar tur leh, zalenna man tamzia a thara hre nawn turin, Independence Day hmang tura kalkhawmte a chah a ni.

Pu Lalrinmawia Ralte chuan, India rama state-ten hma an sawn leh sawn loh chu mi thiam bik thlanchhuahte zirchianna atanga teh thin a nih thu sawiin, tehna hrang hrang hmanga zirchiannain Mizoramin hma a sawn tih a puan thu a tarlang a. 

Mizoram sorkar-in, tanpuina mamawhte khaichhuahna tura ruahmanna hrang hrang a kalpui te chu a hlawhtlin theih nan, a dawngtu mipuiten mawhphurhna lian tak an neih thu, Tlabunga Independence Day hmanpuitu Pu Lalrinmawia Ralte chuan a sawi a; Sorkar-in hma a lo lak tawhnain a la tuam kim loh lai hnawh khahna turin ruahmanna siam zel tum a nih thu a sawi bawk.

Tlabung chu Mizorama khaw upa pawl leh, khaw lian hmasa ber pawl a nih thu sawiin, hmun pawimawh tak tak awm hmasak berna khua a nih thu, Political Adviser to Mizoram Chief Minister chuan a sawi a; Tlabung chuan duhthusamin hma sawn zung zung lo mah se, than lam panin hma lam a pan zel niin a sawi.

Mizoram sorkar hmalaknain, Tlabungah inthiarna nei lote tan ek-in sak belh a nih tur thu te, kawlphetha tha zawk an neih theihna turin nakkum february thla hma ngeia transformer dah belh a nih tur thu te, Tlabunga tuilian tihchhiat vantlang hmunhma thenkhat thawmthatna tur sum ruahman a nih thu te bakah, Mizoram Chief Minister-in Tlabung tlawh a tum thu pawh, vawiina Tlabunga Independence Day hmanpuitu Pu Lalrinmawia Ralte chuan a sawi a ni.

Thangliana-muala Independence Day lawmna hun hman zawh a nih hnu-ah, khuallian hian sub-divisional hospital : Tlabung leh Leprosy Hospital tlawhin Independence Day puala thilpek a hlan a, hemi hnu hian Tlabung SDO (C) Pi V. Lalmuanpuii'n khuallian leh mi dang sawm bikte pualin, SDO (C) office-ah chaw-chhun a buatsaih a ni.

Pu Lalrinmawia Ralte hi a nupui Pi Lalthanzami Ralte bakah, a PS Pu Lalthakima leh Aizawl atangin mi eng emaw zatin an tawiawm a, vawiin khan Aizawl panin Tlabung an chhuahsan lehnghal a ni.