India Independence Day vawi 72-na chu ram chhung hmun dang rualin vawiin khan Kamalanagar playground-ah pawh lawm a ni a. Pu T.T. Zothangsanga MLA chu Khuallian a ni.

Independence Day lawmna inkhawmah hian Khuallian chuan hnam puanzar pawt pharhin, Chakma Mahila Samiti te'n hnam hla an sa a. Parade contingent 16 te'n hnam puanzar chibai an buk chu Khuallian hian a lo chhang let a. Hemi hnu hian thu a sawi nghal a ni.

Khuallian Pu TT Zothansanga chuan sawrkar lai hnuaia hma sawnna hrang hrang tar langin, HPCD nena inremna neih a nih thu te, NLUP-in state economy a chawi san thu leh chumi hma lakna thlawpa NEDP hnuaia hma sawnna hna hrang hrang thawh a nih thu leh, mipuiin food security act an hamthatpui dan te a sawi.

Kamalanagar-a Independence Day lawmnaah hian Duloram Public Higher Secondary School chu march past-ah pakhatna niin, New Angel School chu pahnihna an ni a. Kamalanagar Govt High School leh Vijoygiri Academy te chu pathumna an ni.

Ceremonial function zawh hnuah Chawngte P Sporting Club leh Bajeisora Sporting Club te chuan Independence Day football final an khel a ni.

He ni pual hian Chawngte SDO (C) Pu S. Kaptluanga chuan Community Health Centre, Chawngtea damlote hnenah thei leh chithlum mum a sem a. Zing lamah CADC CEM Dg. Shanti Jiban Chakma chuan CADC Secretariat-ah hnam puanzar a pawt pharh ve bawk.