1728/2024-2025
Dated Serchhip, the 25th August, 2024: Bangladesh hmar lama thlivir insiam avangin tun ni 2 lo awm tur chhung hian Assam, Meghalaya leh Tripura ah te ruah sur nual tura rin a ni. Mizoram bikah chuan August ni 24 atanga 27 inkar chhung hian chhim lam Lunglei, Lawngtlai, Siaha, Mamit leh Serchhip district-ah te tam zual tura ngaih a ni. He ruahpui sur avanga kuthnathawktute’n harsatna an tawh loh nan leh an lo inhmakhua lawk nan AgroMet Field Unit (AMFU), ICAR, Mizoram Center leh Directorate of Agriculture, Government of Mizoram, Meteorological Centre (Aizawl) leh District agro-met unit (DAMU), KVK, Lengpui tangkawp chuan August 23 khan special bulletin a tichhuak.
1. Khaw chhiat laiin leitha pek leh hlo kahte tih loh tur a ni.
2. August ni 24 - 27 inkar hian ruah a sur tam hmel avangin ruah surin thlai rah leh thei rahte a den chhiat loh nan net hmangin emaw a theih chuan khuh hram a tha.
3. Leiletah tui a tam lutuk chuan luan chhuahtir tur a ni a, hmun zawla thlai chingte pawhin thlai hmuna tui a tlin loh nan tui luanna tur siam tur a ni.
4. Tun hnaiah ruah a sur nual bakah ala sur nual hmel avangin thlai hmuna tui a tlin loh nan tui luanna tur tha taka siam tur a ni a; tuiin lei a chim hian thlai zung tawih a awm duh thin a, thlai an thih phah thin.
5. Thei leh thlai rahte an huh hian a rit duh a, a zar an uai nat avangin a zarte a kurin a tliak duh thin; chuvangin a zarte chu do that tur a ni.
6. Tlangram buhte a vui chho tan tawh a, chuvangin ruah sur nasain a tih tluk loh nan mahni remchan danin lo inhmakhua tur a ni.
7. Ruah ala sur nual hmel avangin ruahtuiin lei hanna a kalral pui lutuk loh nan buhpawl emaw, hnim emawin lei khuh tur a ni a, lei khuh hian thlai tlu tur leh a zung lang turte a veng ve a ni.
8. Khua a chhiat hian bacterial wilt natna thlaiah a awm duh thin a, he natna a awm a nih chuan streptocycline 0.6g hi tui liter khatah pawlhin khaw that laiin kah tur a ni.
9. Sangha dil chhunga tuihawk a luh hian chirhdiak leh bawlhhlawhte a ken tel teuh thin avangin a luan luh lohna turin a bul velah tui luanna tur tha taka siam tur a ni.
10.Sangha dil a khah loh nan a luan chhuahna tur siam tur a ni a, he a luan chhuahna turah hian sangha an chhuah loh nan net hmanga khuh tur a ni.
11.Khaw chhiat laia leitha pek vak leh sangha chaw pek tam hian dil chhunga oxygen a tlem phah thin a, chuvangin pek vak loh tur a ni.
