1727/2024-2025
Aizawl the 24th, 2024 : Khawvel ram hrang hrangah Monkey Pox vei hmuh chhuah an awm tak nual avang leh he hriin Mizoram a lo luh ve palh hlauhthawn thila lo inralrin lawkna atan nimin August ni 23, 2024 khan Directorate of Health Services Director's Meeting Room-ah Health Directorate Officials te an thu khawm.
He meeting hi Dr. Vanlalsawma, Principal Director in a kaihruai a. DHS leh DHME hnuaia Senior Officers eng emaw zah an tel bawk. He meeting-ah hian Dr. Vanlalrengpuia, State Nodal Offiicer, IDSP chuan khawvel ram hrang hranga M.Pox case san chhoh zel dan, invenna leh enkawlna chungchang bakah inbuatsaihna chungchang presentation a pe a. India ramah hian case hmuh la ni chiah lo mah se tunlai khawvelah inkalpawhna a awlsam tawh avangin he hri hian min luh chilh thuai lovang tih a sawi theih loh niin SNO, IDSP hian a tarlang.
ZMC chu ICMR lamin Sentinel Site atan a lo puan tawh avangin thuam chaka tihchangtlun chhoh zel a ni a. India rama Laboratory tha zual thlan chhuah 28 zingah pawh a tel hial tawh a. Hei vang hian ZMC pawh hian nikum 2023 December thla atang tawh khan hri pui leng a awm palh pawha lo in rinlawk dan tur kawng hi ruahmanna a lo kalpui daih tawh nghe nghe a ni. Tin, ZMC bakah hian Civil Hospital, Lunglei pawh tlema tih changtlun chuan Sentinel Site atan hman mai theih a nih beisei a ni.
Nimin Health Department Official thu khawm hian Core Committee on M.Pox din nghalin he Core Committee hnuaiah hian committee peng hrang hrang din chhawn leh a ni ang. State Level Committee erawh a tul dan angin Higher Authority kaihhruaina in la din chhoh ni se tih a ni bawk.
Nimin vek khan Health Department chuan thu chhuah an siam nghal a. Tun hnaia Mizoram chhunga social media hrang hrang hrangah Siaha naupang M.Pox hri vei hmuh chhuah ni awma thu thang chu thu dik lo a nih thu leh naupangin a vei natna hi Tangseh (Chicken Pox with Secondary infection) a nih zawk thu a tarlang a.
Naupang pawh hi tunah chuan a dam tawh bawk a ni. Tin, Social media-a thuthang dik lo awm thin chu pawi an tih thu leh hemi kawngah hian thil chiang lo, mipui thin ti thawnga tithlabar thei thil theh darh lo turin mipuite an ngen nghal bawk. Chutih rualin he hri avanga chi-ai mai lo tur leh sawrkar leh department hmalakna te ngaichang thiam turin mipuite a chah nghal bawk.
Monkey Pox kan tih mai hi mizo tawnga a hming kan la neih chiah loh thil a ni a. Zawng hri ti a mizoten kan lo hriat lar thin ‘Small Pox’ nen a in ang lo va, ngaih pawlh loh tur a ni bawk.
