Vawiin khan Minister Pu Zodintluanga chuan a department enkawl pahnih, UD&PA leh PHE Department-te chu Secretariat Administration Department Conference Hall-ah a vawi khatna atan joint meeting a neihpui a. Minister chuan Biate, Khawhai leh Zawlnuam khaw chawmtu tur Water Supply Scheme Detailed Project Report (DPR)-te chu August thla chhungin Sorkar laipuia Ministry of Urban Development hnuaia 10% Lumpsum Grant scheme atanga fund hmu turin buatsaih a nih tur thu a sawi. He hunah hian UD&PA leh PHED Secretary-te leh officer-te bakah SIPMIU lama hotute an tel a ni.
Minister chuan Department pahnih tangkawp hian Sorkar laipui atangin project tam tak an siam theih thu leh, UD&PA leh PHE Department-te chu mipuite rawngbawltu pawimawh tak an nih avangin a thawktu officer-te pawh inpawhna tha nena hna an thawh a tul thu a sawi a. Ministry of Urban Development atangin PHE Department hian fund chi hrang hrang a lakchhuah theih avangin UD&PA Dept nen hian department inunau an ni a, hna an thawh dun thiam a pawimawh a ti bawk.
Pu Zodintluanga chuan contractor chhawr chungchangah contractor-te an remchan anga hna an thawh nghah mai loh tur a ti a. Hun leh sum sen thlawn a awmloh nan a chhawrtu Department-ten a hmuna enpui a, a hun a an zawh hman theih ngei nan hma lak thin tur a ni, a ti. Department hnathawh reng reng hi a chhawrtu tur mipui an nih avangin project-te a hun taka zawh a nih theih nan tan la turin Minister chuan officer-te a chah a ni.
Meeting-ah hian PHE Department leh UD&PA Department hotute hian an department hmalak tawhna hrang hrang bakah an hmachhawpte report an pe a. Biate, Khawhai leh Zawlnuam Water Supply Scheme DPR siam tur ruahmante hi August thla chhunga siam zawha, Sorkar laipuia Ministry of Urban Development-ah thawn thlak a, September thlaa Central Sanctioning and Monitoring Committee-in a lo ngaihtuah hman tura buatsaih tum a ni.
Meeting-ah hian SIPMIU hmalakna hrang hrangte sawi a nih bawk a. Project hmachhawpte pawh chak tak leh felfai taka kalpui a nih theih nan PHED leh SIPMIU-te pawh inpawhtlan a tul thu an sawi a ni.
