Vawiin khan Australian High Commission a mi pawimawh Pu Brendan Hodgson, Second Secretary leh Pu Chiria Perro, Third Secretary te chu Chief Secretary Pu Vanhela Pachuau hovin Chief Secretary Conference Hall-ah sumdawnna leh Industry chungchanga thil pawimawh hrang hrang te sawihona neih a ni.
Kaladan Multi-Modal roads India-Myanmar leh Bangladesh nena inkalpawhna tur chungchang chu Chief Secretary Pu Vanhela Pachuau chuan a report a. He kawng hi a tlang hunah chuan awlsam lehzualin khawchhak unaute nen sumdawnna ah a awlsam phah tur thu a sawi chhuak a ni.
Mizoram ah Land Custom Station leh Integrated Check Post 3 (pathum) a awm tawh thu sawi chhuak in Zokhawthar LCS chu hawn theih a peihfel a nih tawh thu a sawi a, Zorinpui LCS leh Kawrpuichhuah ICP pawh chak taka hmalak mek a nih thu Chief Secretary chuan a sawi lang bawk.
Chief Secretary chuan Visa chungchang pawh sawi chhuakin awlsam taka Visa neih theih nana hma lakpui turin a sawm bawk.
Australia ram te nen skill development/trained nurse chungchang a thawhho dan tur te sawiho a ni a. Thawhho dan turah hian Australia mi pawimawh chuan lo enzui an tum thu an sawi.
Mizoram hi lirnghing tehna ah zone 5 na ah a awm thu sawi chhuakin lirnghing zirna Institution din chungchang ah Australia sorkar puihna dil a ni bawk. Hydel Project chungchangah Mizoram in Project siam tur tam tak a neih thu sawi lang a ni bawk a, amaherawh chu sum lam a harsat thu sawi chhuah a ni bawk a. Foreign puihna a awm theih chuan nasa takin Hydel Project ah hma sawn theih a ni ang tih dawn a ni. Mizoram ah chuan Bamboo Industry, Food Processing Industry leh Handloom & Handicraft te Socio-Economic Development atana a that tur thu sawi a ni bawk.
He meeting ah hian Department hrang hrang atangin Secretary, Tourism Pi B. Sairengpuii ; Secretary, Finance Pu Lalthansanga ; Director, Industry Pu Zothankhuma ; Engineer-in-Chief, PWD Pu Lianchungnunga ; Chief Engineer, Power & Electricity Pu L. Pachuau ; Joint. Secretary, Trade & Commerce Pu Vanlalngaihsaka ; Joint Secretary, PWD Pu R. Lalrintluanga ; Joint Secretary, Industry Pu K.T. Lalrikhuma ; Joint Director, Trade & Commerce Pu H.D. Lalrintluanga ; Joint Director, Industries Pi R. Lalrodingi ; Joint Director, Geology & Mining Dr. H. Lallenmawia.
