Education Minister Pu Lalsawta chuan kan ram dinchhuahpui tur chu Zirna hi a ni, a ti. MZP, Kolasib District hqsr. ten HSLC leh HSSLC tithe zualte chawimawina hun vawiina Kolasib Diakkawn Hall-a an buatsaih hmanpuiin he thu hi a sawi a. MZP ten hmathlir thui tak nei chunga zirlai chhuanawmte chawimawi nachang a hria hi a lawmawm hle a ni, a ti.

Pu Lalsawta chuan, Mizoramah hian khawl ropui tak tak TV leh fridge te, lei laihna leh bungraw pawimawh dang kan siam chhuak mai lovang. Amaherawhchu Zirna hmang hian kan ram dinhmun kan siam thei a, zirna hmang hian dinhmun changkang leh sang takah kanin vawrh thei a ni, a ti. Mizoramah zirna tichangtlung turin hma lak mek a ni a. Zirlaiten nuam taka subject har tepawh an zir theihna turin Joyful learning-ah kan lut dawn a. Nakkum lawk atangin zirlaibu pawh tun aia rip lo tura thlak hman beisei a ni a. Technical entrance pawh India ram pumah Common Entrance Examination neih tawh tum a nih avangin marking system pawh kan her danglam ala ngai dawn a ni, a ti.

Kolasib-a Govt. Higher Secondary School la awm loh avanga harsatna hrang hrangte Minister hnena MZP leh NGO ten anlo thlen chungang chhangin Pu Lalsawta chuan, Sawrkar chuan he thil hi a hriat reng thu sawiin tun dinhmunah chuan sum indaihlohna nasa tak avanga tih nghal theih a nihloh thu a sawi a. Sawrkar hmasa khan kum 2008 inthlan dawna school 337 lai dinhmun sang zawk- Govt, Adhoc grant in aid leh lump sum te-a alo hlankai avang khan sawrkarna kan chelh atangin sum thahnem takah indaihlohna kan hmachhawn ta a. Hei hian thiltih a ti harsa hle a ni, a ti a ni.

Vawiina zirlai chawimawina inkhawm hi Pu H. Lalhruaitluanga, Vice President, MZP, Kolasib-in a kaihruai a. Pu H. Lalthlamuana, President, MZP Kolasib, Pu L. Ramdinliana Renthlei, MZP gen. Hqrs, Pu Zairemmawia, Addl. DC leh Pu B. Lianthlira, DEO ten thu an sawi bawk a ni.

Vawiin vek tlailam khan Education Minister Pu Lalsawta chuan Kolasib khaw chhunga Zirtirtu zawng zawngte hmuin he hunah hian thuchah a sawi a ni.