Rev J.W.Downs. General Suprintendent of United Pentecostal Church, Australia chuan nimin tlai khan Chief Minister Pu Lal Thanhawla chu a chenna Bungalow ah hmuin inkawmna hun tha tak an nei.

Rev Downs hian tunhma pawhin Pu Hawla hi alo kawm tawh thin a. Tun tumah hian a nupui Suzanne Downs leh American nula pahnihin an tawiawm a ni. Rev Downs hian Kolasib Khuangpuilama nau hnuchham enkawlna Audrene Scism Childrena’ Home hi ama rawn bultum niin, tun thleng hian an rawn la vil reng a. Heng nauhnuchham ten zirna an neih theih nan a nupui hmingchawiin Suzanne Downs Boarding School, pawl 10 thleng a thlawna zir theihna an din bawk a ni. Kar leh chhung khian ASCH ah hian an cham ang.

Rev Downs leh a rawn zuitute hi Rev P.Chunga, Gen Superintendent of UPC, NEI leh Rev R.Lalrinsanga, Gen Secretary, UPC NEI ten an tawiawm a. Chief Minister nupui Pi Lal Riliani’n Rev Downs te hi Mizo kutchhuak thil siam a hlan bawk a ni.