Spastic Society of Mizoram buatsaihin vawiin khan Bawngkawna Gilead Special School tualzawlah Health Minister Pu Lal Thanzara, Spastic Society of Mizoram Governing Board Member ni bawk hovin World Autism Awareness Day puala hun hman a ni. World Autism Awareness Day hi a ni tak chu April ni 2 ni mah se, remchan zawkna avangin Spastic Society-te chuan vawiinah an hmang a ni.
Pu Lal Thanzara chuan Autism hi Mizoramah hmelhriat hlawh vak lo mahse nei an awm nual tawh a, kum kalta atanga din Autistic naupangte enkawlna bik school-ah naupang pariat awmin la lut remchang rihlo pawh an awm a ni, a ti a. Fate vanduaina la pawm theilo, anmahni enkawlna bik hmuna la hruai nachang hre rihlo te chu an fate nihna pawm a, enkawlna tha an dawn thuai theih nana hruai theuh turin a sawm a ni. Health Minister chuan Autism awmzia hi Mizo mipui zingah sawi zau a ngai hle a, kan hmelhriat tawk loh avangin Autistic fa nei nu leh pa thenkhat chuan an fate nihna tak an hre mai thei thin lova, hei hian enkawlna tha an dawnna tur kawngah a ti khawtlai thei a ni, a ti a. World Autism Awareness Day ah hian Spastic Society of Mizoram-te chuan Autism inhrilhriatna kawngah hma la in hetiang lama harsatna neite tan an inhawn reng thu a sawi a ni.
State Chief Information Commissioner Pu Lal Dingliana pawhin he hun hi hmanpuiin anmahni chhungkua ngei a he harsatna lo tawk tawh an nih dan sawiin an fapa Autistic a ni tih an hriatchhuah tirh chuan India ram khawpui lian zawkah pawh inenkawlna mumal a la awm loh avanga harsatna an tawh dan a tarlang a. Autism hi naupang tute mah hian nei lo se duhthusam a nih rualin a nei mek te tan zirtirna leh enkawlna hmun tha a awm ta chu lawmawm a tih thu a sawi a ni.
Kum kalta khan Autism enkawlna hi Gilead Special School-ah din niin Communication DEALL, Bangalore nen an thawk hova. Sum mamawh hi Sir Ratan Tata trust atangin an dawng a ni. Nikum khan zirlai pali neiin bul an tan a, kuminah hian zirlai pariat an awm mek a ni.
Inkhawm hi Spastic Society of Mizoram Secretary Pi Chhingpuii’n a kaihruai a, Special Educator C.Zothansangi’n report a pe a, Vice Chairperson Pi Neihtluangi’n lawmthu sawiin hun hnung a khar a ni.
