Vawiin chawhma khan Agriculture Committee Room-ah Mizoram Oil Palm Advisory Committee a vawi-12-na atan Lt. Col. Z.S. Zuala, Parliamentary Secretary, Agriculture hovin an thukhawm.

Oil Palm Development Programme hi Public Private Partnership (PPP) mode a kalpui niin a tum bul ber te chu: Kuthnathawktuten sumfai tam zawk an hai luh na tur atana hmalak te,Ram leilung hlutna lo tla hniam leh chhe zel tur ven leh ram ngaw humhalh chung a eizawnna ngialnghet zawk siam te, Kum tin tlangram loneiha eizawnna bansan a lo hmunnghet, eizawnna tling siam te, Oil Palm chingtuten kumtluan a sumfai an hai luh theihna tur te, Mizoram ei leh bar leh sum dinhmun te Oil Palm chin hmanga siamthat a ram leilung hman tangkai te a ni.

Oil Palm chin kawng ah hian Mizoram sawrkar hian Company thawhpui 3, Godrej Agrovet Ltd.,Ruchi Soya Industries Ltd leh 3F Oil Palm Agrotech Pvt Ltd. Te thawhpui in an ni nen hian MOU felfai tak hnuaia hnathawh a ni.

Godrej Agrovet Ltd hian Kolasib leh Mamit District enkawlin ram 11,590 Ha a zau ah hma lak tawh ni in Oil Palm rah (Fresh Fruit Bunch) tharchhuah pawh 8,896 MT lai a tling tawh. Oil Palm Mill pawh ni 28.10.2014 khan Bukvannei, Kolasib District ah bun a ni tawh bawk.

Ruchi Soya Industries Ltd. hian Lunglei & Lawngtlai District huam in ram 8,818 Ha a zau ah Oil Palm chingin a rah 220.024 MT a thar chhuak tawh bawk.3F Oil Palm Agrotech Pvt. Ltd. hian Aizawl, Serchhip leh Saiha District te huam in 2950 Hactare a zau atangin a rah 29.562 matricton a lo thar chhuak tawh bawk a ni.

Meeting ah hian company 3 te dinhmun leh hnathawh hrang hrang thlir letna hun hman a ni in company aiawh a lokal ten an dinhmun theuh sawifiahna hun an hmang bawk.

He Oil Palm Advisory Committee meeting ah hian Agenda hrang hrang chhawpchhuah ziang ah 3F Oil Palm Agrotech Pvt. Ltd. in Saiha District an enkawl lai chu Ruchi Soya Industries Ltd. hnen a hlan chhawn te, kum 2016-17 chhunga District hrang hrang a Oil Palm chinna tur ram zau zawng bithliah te leh awm ze nei leh zual a Oil Palm chin a nih theihna tur atan a District hrang hrang in rawtna leh ruahmanna an neih te sawiho ni in hemi tur atan a Oil Palm seedlings awm theih dan te sawiho a ni bawk.

Advisory meeting hmasa in kum 2017-18 chhunga hma lak dan tur a lo rel tawh te chu ngun leh uluk zawka sawihona neih a nih hnuin ruahmanna thar siam nghal a ni bawk. Oil Palm hi a theihna hmun apiang ah zau khat, ram inpawh tlang a chin a nih theih na tur atana District Agriculture Officer te ruahmanna te thlirho a ni bawk.

Ruchi Soya Industries Ltd. leh 3F Oil Palm Agrotech Pvt. Ltd. tun thleng a Oil Palm Mill an labun fel theih loh chhan te meeting ah hian sawi lan a ni bawk.

He Oil Palm Advisory Committee ah hian Member Secretary leh Director of Agriculture (Crop Husbandry) ni bawk Dr. C. Lalzarliana chuan member kalkhawmte hnenah Mizoram Oil Palm chin dinhmun tlangpui sawifiana hun a hmang a, committee member-te bakah DAO leh Officer engemawzat meeting ah hian an tel.