Mizoram Upa Pawl General Assembly vawi 44-na vawiin khan Social Welfare Department Minister Pu P.C. Lalthanliana hovin hman a ni a. Aizawl bakah Mizoram District hrang hrang atangin MUP member leh hruaitute Vanapa Hall a lenglo khawpin an kal tha a ni.
Vanglai leh thatlai hun chhunga chhungkua, khawtlang, Kohhran leh Ram tana lo in hmang leh mi tangkai tak lo ni thin an nih avangin MUP member te chu tumahin an ngainep thei ngai lovang tiin khuallian Pu PC Lalthanliana chuan kan ram leh hnam kal zelna turah Mizoram Upa Pawl te hian tihtur pawimawh tak an nei a ni tih hi hria a chawl mai thei an la ni bik lo tih chu hre reng tura a duh thu a sawi a. Tun dinhmun atanga hmasawnna kawnga ke pe tur hian sum leh pai sen tam a ngai lo, kan tih dan thalo bansan in, tih dan tha zawk ti tur a inbuatsaih thar in hmasawnna lamtluang chu zawh tura inbuatsaih zawk turin MUP member te chu a sawm a ni.
Zo hnahthlak Zoram pawn hmun hrang hranga awm te pawh in an thlamuan pui Chief Minister kan nei hi a chhuanawm in a vanneihthlak hle a ni tih chu MUP member te hnenah a sawi duh a ni tiin Minister chuan Sorkar in Upa pawl member te tan hamthatna tam tak a lo sial chhuak tawh a, tunah pawh hmalak zel a la ni a, ngaihhlut tur dik tak ngaihlu a, buaipui tur dik tak buaipui tur a ni a. Duhzawng leh awh zawng nilovin, mamawh chauh neih tum tur leh chu chuan hmasawnna kawng dik Mizo te a zawh tir ngei a beisei tlat thu a sawi a. Upa Pawl Member te hnenah hian Social Welfare Minister Pu P.C. Lalthanliana chuan Rs. 1,00,000/- a hlan ani.
Vawiin MUP General Conference vawi 44 na Pu RK Thanga, President kaihhruai ah hian Upa K. Malsawma, Adviser hruaina in nikum April atanga kumin March chhunga an member mi 1483 zet thi te sunna hun leh tawngtaisak hun hman a ni a. Pu Sainghinga Sailo, General Secretary hnen atangin thupuan leh report ngaihthlak a ni a. Pu R. Thankima, Financial Secretary hnen atangin Financial Report ngaihthlak a ni bawk.
Chawhnu lamah Pu Lalhuapzauva, Vice President kaihhruaina in rorel leh agenda sawiho a ni a, Aizawl pawn atang lokal leh Mizoram state pawn atanga lokal palaite chibai bukna hun neih a niin Budget 2016 -2017 sawiho a ni bawk.
Agenda tam tak an neih zingah Mizo mipaten kan nupuite nu leh pa koh dan inang tlang lo hi koh dan inang tlanga koh anih theih nan MUP hian hmalak nise tih te, kumpuan thupui atan Taimakna, Tumruhna leh Rinawmna tih te bak ah Corruption do, Cancer do tura tanlak leh Ram leh Hnam humhalh tih te chhawpchhuah a ni bawk.
