Vawiin khan Hawla Indoor Stadium-ah infiamna lama ti thate hnenah Incentive Cash Award 2012 - 2016 hlanna inkhawm neih a ni a, he hun hi Pu Joseph Lalhimpuia, Parliamentary Secretary in a hmanpui a. Inkhawm hi Pu Zothanmawia, Director, Sports & Youth Services in a kaihruai a ni. Cash Award hi International, National, Regional a inelna te ah leh Special Olympics, Los Angeles a neiha infiammi ti tha te hnenah pek an ni.

Pu Joseph Lalhimpuia chuan insum theihna a tangin hlawhtlinna a awm thin a, chuvangin infiammite chu an talent haichhuahna kawngah pawh insum theihna nei zel turin a chah a. Infiammite chu Mizoram sorkar-in an hma ngaiin theih tawp a chhuah a, infiamna hmanrua leh hmunhmate a theih angin a ngaihtuah a ni a ti. Infiammite tan Defence, Banks leh Railways ah te hian luh theihna kawng a awm a. Hengte hi hmang tangkai turin Parliamentary Secretary chuan kalkhawmte chu a chah bawk.

Vawiin hian Aizawl District-a infiamna lama ti tha mi 1273 hnenah Rs. 128,50,000/- sem a ni.

Mizoram sorkar-in kum 2001 khan Sports chi hrang hranga inelnaa ti tha zualte tana hamthatna hmuh theih dan (Rules) a ruahman tawh a. Kum 2003 khan he ruahmanna dan hi changtlung zawkin siamthat leh a ni a, Mizoram Sports Incentive cash Award Rules tih a lo ni ta a. Sport Incentive Cash Award dawng hmasa ber chu R. Lalremliani niin kum 2001 - 2002 khan Rs. 80,000/- a dawng a. 1st Asian Women Boxing Championship, Bangladesh a neihah Silver Medal a dawng a ni.

Sports Incentive Cash Award hi district hrang hrangah pawh sem a ni dawn a. Serchhip District ah ni 21.4.2016; Mamit leh Champhai District ah 22.4.2016 ah leh Lunglei, Lawngtlai leh Saiha District chu 26.4.2016 ah sem an ni ang.