Vawiin khan Raj Bhavan-ah Principal Secretary to Chief Minister Pu Lalram Thanga, IFS kaihhruaiin ni hnih awh tur meeting neih a ni a. Lai, Mara leh Chakma Autonomous District Council (ADC) huamchhunga hnathawh thlirhona leh hmalak dan tur sawiho a ni.

Pu Lalram Thanga chuan India Danpuiin 6th Schedule hnuaiah Autonomous District Council ten mahnia an inrelbawlna turin thuneihna sang tak a pe a, chu thuneihna sang tak chuan mawhphurhna sang tak a keng tel a ti a. District administration leh Council sawrkar te chu inlungrual taka mipui tana thawkho turin a chah bawk a ni.

He meeting-ah hian Aizawl DC leh Lawngtlai DC lo ni tawh Dr. A. Muthamma chuan Autonomous District Council-te kalhmang a tarlang a. Hemi zawhah hian ADC aiawhten an sum leh pai dinhmun leh harsatnate an tarlang a. Kumthar 2018-19 atana budget an ruahman chhin te leh kum kallaia sum an hman dante thlirho a ni.

Tui thianghlim in tur, faina, kawlphetha leh inkalpawhna kawngpui lama hmasawnna ruhrel an neih dante ngaihthlak ho leh a ni a. Hriselna lama an harsatna hrang hrangte tarlan a ni bawk. He meeting-ah hian Siaha leh Lawngtlai DC te bakah a changtu department atangte in thusawi ngaihthlak a ni a, hmalak dan tur ruahmanna sawiho nghal a ni.

Vawiin meeting-ah hian PWD, PHE, P&E, Planning & Programme Implementation, Finance department, Health, Border Roads Organisation hotute bakah Accountant General, Aizawl, Lawngtlai leh Siaha DC te an tel a. Naktukah education, skill development, internet connectivity leh border security chungchangah meeting neih chhunzawm leh a ni ang.