660/2026-2027
Aizawl dated 22nd May 2026 : Vawiin khan Commerce, Industries, Geology & Mining Minister Pu F Rodingliana Office Chamber-ah State Sorkar leh Autonomous District Council ten Danin a phut anga Minor Minerals (lung, balu, brick earth/clay) atanga Royalty (chhiah) hmuhte insem dan tur mi pawimawhten an rel.

Chhiah (royalty) insem dan tur Department lamin rawtna an siamte Autonomous District Council huam chhunga MLA te nen sawihona hun an hmang a. Geology & Mining Joint Director Department Er. Lalremmawia chuan powerpoint presentation pein Minor Minerals atanga royalty (chhiah) insem dan tur India Danpui (Constitution) leh Mining Dan (Legislation) a tarlan te a sawifiah a. Hemi zawh hian sawihona hun neih a ni.

India Constituiton 6th Schedule Para 9(ii) in a sawi angin Autonomous District Council Area chhunga heng mineral te hi State Sorkarin phalna pein a enkawl tur a ni a, a chhiah(royalty) pawh a khawn tur a ni. Heng royalty a hmuh atang hian Autonomous District Council te hnenah an chanvo (share) an pe ve tur a ni a. India rama State 4-Assam, Mizoram, Meghalaya leh Tripura ten 6th Schedule area neiin Autonomous District Council an nei hlawm a. Heng State dang pathumten royalty an insem (share) mek dan zirchianna leh sawihona hun an hmang a ni.

Tuna Mizoram chhunga kalpui danah chuan Autonomous District Council ten heng minor mineral te hi enkawlin royalty pawh an la chang vek a. Amaherawhchu, heng Minor Minerals te hi State-in a enkawlin royalty pawh a khawn zawk tur a ni tih tarlan niin India Constitution leh Mining Dan (Legislation) anga kalpui tawh turin royalty insem dan tur Department in ruahmanna a siam te sawiho a ni a. Tuna Geology & Mining Department ten proposal an siam hi Sorkar lamah ngaihtuah tura thehluh phawt ni se tiin an rel.

He sawihonaah hian Pi Prova Chakma, MLA West Tuipui; Pu Rasik Mohan Chakma, MLA Tuichawng; Pu C Ngunlianchunga, MLA Lawngtlai West; Dr. K Beichhua, MLA Siaha; Dr. Lorrain Lalpekliana Chinzah, MLA Lawngtlai East; Dr H Lianzela, Secretary Commerce, Industries, Geology & Mining; Pu J. Chamliana Director Geology & Mining bakah Commerce, Industries, Geology & Mining-a Official te an tel a ni.