659/2026-2027
Aizawl dated 22nd May 2026 : Mizoram Sawrkar flagship Scheme - Bana Kaih Scheme kalpui meka loan dawng tawh, Progress Partner leh Chief Minister Special Package dawngtute hmalakna thlirletna hun chu I&PR Auditorium, Treasury square, Aizawlah neih a ni a. Pu Lalfakzuala, CEO, Handholding Scheme chuan he hun hi kaihruaiin, Dr. KC Lalmalsawmzauva Adviser to Chief Minister (Implementation of Handholding Scheme), Pu David Lalthantluanga, Secretary, Planning & Programme Implementation Department, Mizoram State Project Coordination Committee member-te, Bana Kaih Scheme Implementing Department-a Nodal Officer-te bakah Bana Kaih Scheme thawhpui bank; SBI, MRB, MCAB leh UBI hotute an tel a ni.

Dr. KC Lalmalsawmzauva, Adviser to Chief Minister (Implementation of Handholding Scheme) chuan Sawrkar hmalakna hlawhtlinna chu Project kalpui tan a nih atanga uluk taka vil zui a nih thu sawiin, hmalakna vil zuina hian Project hlawhtlinna tura inher rem ngaihna laite, kalphung thlak ngaihna laite a chinfel zung zung thin thu a sawi. Mizoram Sawrkar flagship Scheme - Bana Kaih Scheme kaltlanga mi taima leh theihna nei, ram tih hmasawnna kawnga Sawrkar thawhpui thei tura Progress Partner atana thlan chhuahte hmalakna a hlawhtlin lehzual nan Implementing Department-a thawktuten uluk taka an enzuia, thawm chak an ngaihna lai apiangah thuam tha zel turin Nodal Officer kalkhawmte chu a chah a ni.

Pu KC Lalmalsawmzauva chuan Handholding Scheme kaltlanga loan late leh Chief Minister Special Package dawngtute zingah hmasawn pui tam tak an awm rualin hmasawn pui vak lo pawh an awm theih thu a tarlang a. Hlawhtlin pui ve lote harsatnate zirchian leh hlawhtling ve tura an harsatna sutkian a nih theih nan Implementing Department-a mithiam ten an hmalakna a hmun ah ngei zirchianga, bana kaih an mamawhna laiah hlawhtling tura kai kal zel turin a fuih bawk a ni.

Pu David Lalthantluanga, Secretary, Planning & Programme Implementation Department chuan Mizoram Sawrkar flagship Scheme - Bana Kaih Scheme chu ram tih hmasawnna tura Implementating department hrang hrangte thawhhona hnuaia hmalakna a nih thu a sawi a. Progress Partner thlanchhuah ten hlawhtlinna tluan tling an neih theih nan Implementing Department-te tanrual a pawimawh thu a sawi.

Vawiin a Bana Kaih Scheme hnuaia Progress Partner thlanchhuahte leh Chief Minister Special Package dawngtute hmalakna thlirletna hun ah hian State Bank of India aiawh tarlan danin, loan dawng thei tura mi thlan chhuah 101 an awm a. Loan pek chhuah tawh hi cheng Vbc. 9.46 ni tawhin, loan pek chhuah hmabak mi 49 a awm mek a ni. Mizoram Rural Bank hnuaiah loan pek tur mi 286 awmin, 164 pekchhuah tawh a ni a. Loan pek chhuah tawh hi cheng Vbc. 22.06 a ni. Mizoram Cooperative Apex Bank kaltlanga Bana Kaih Scheme hnuaia loan dilna lut 105 atangin 56 chu pek chhuah tawh a ni a, cheng Vbc. 9.35 a ni.

Implementing Department tin atangin Bana Kaih Scheme hnuaia Progress Partner leh Chief Minister Special Package dawngtute hmalakna dinhmun chu Powerpoint presentation hmangin enho a ni a. Bank lamin harsatna an neihte chinfel dan tur leh Monitoring chak lehzuala kalpui a nih theih dan tur sawi ho a ni a. Bana Kaih Scheme kal hmang zau zawka inzirtirna leh Bana Kaih Scheme kaltlanga hlawhtlinna changte lawmpuina hun buatsaih dan turte sawi ho a ni bawk.