Vawiin khan Mizoram Youth Commission Chairman Pu T. Sangkunga hovin thla ruk (6) chhung Institute for Quality Skill Training (IQST), Guwahati-a “Aviation and Tourism Hospitality” zir tur thalai 32-te thlahna hun DRDA Conference Hall-ah hman a ni a. He hun hi LE&IT Director Pu Rotluanga’n a kaihruai a ni.

Pu T. Sangkunga chuan trainee turte chu an hriat tur tul pawimawh te hrilhin, tuarchhel leh rinawm taka zir turin a chah a. Hlawhtling taka an lo let leh ngei a beisei thu a sawi bawk.

Hun kaihruaitu Pu Rotluanga chuan zirlaite chu Sorkar atanga hamthatna an dawn theihte hrilhfiahin, harsatna an tawk palh anih pawhin rang taka hotute hriattir thin turin a chah a ni.

He hun a thusawitu dang Dr. J.T. Vanlalngheta, Secretary, MYC chuan IQST chu thawhpui atana tha tak a nih thu leh, an training na hmuna kal thei an ni chu an vanneih thu leh, chu a an vanneihna chu chhawr thiam turin trainee turte chu a chah bawk.

Tun tuma MYC leh LE&IT Department tangkawpin training tura thalai 32 (mipa leh hmeichhia) an tirhchhuah te hi IQST, Guwahati a thawk mi pahnih ten an hruaithla a. Vawiin thlahna hunah hian Pu Amit Chaudhury, General Manager, IQST, Kolkata, Pu Francis Lianmawia, Assistant Welfare Commissioner, Workers’ Welfare Board (LE&IT Dept.) leh Pu Lalsawmzuala, Superintendent, MYC ten an hmanpui bawk a ni.